A kiging sa-in a om dingin Topa’ nang leh kei hong deih hi.

Tuni Lungdamna Laisiangtho sungah Topa Jesu in thu gentehna nam nih hong lak hi. Amasa in Mihing Tapa hong pai ciangin guta bangin hong pai ding ahih manin sun leh zan, ahun ani ki thei khol lo ahih manin a kiging sa-in a om dingin Topa’ nang leh kei hong deih hi.
Anihna thugentehna ah a Topa om loh kalin inn sung, lo sung vai khempeuh a ki-ap acitak nasempa bangin nang leh kei Topa’ hong deih hi, hong sam hi, hong teltuam hi cih hong phawk sak hi.
Topa’ thagui thatang, pilna siamna te khat ciat tungah hong guan hi. Tua pilna, ciimna, thahatna, theihna te bang ci zat ih hiam? Na phungsak hiam, na khang sak hiam, nang ading bekin na zang kha hiam, midangte adingin a kihel nai hiam, Topa’ adingin bangzah ih metbawl kha hiam, a kigingkhol sa in ih om nai hiam? Nikhat ni ciangin Topa mai ah ama hong piaksa hun leh ni te thagui thatangte, pilna siamna te leh ama hong piak hih ih leibuk a siangtho dingin a deih, acing akem dingin a hong sawl tua thu tawh kizui in Topa mai ah khat vei ih ding ding hi.
Itna na nei hiam, cihtakna na nei hiam, thumanna na nei hiam cih tuni ei leh ei khat ciat ih kisit tel ding hi. Tuni eite khat ciat in a citak nasem te ih hih zawh na dingin Topa’ hong makaih tawntung ta hen.