Nang leh kei adingin lainatna a ngah Tonu

Tuni ih zak Lungdamna Lai Siangtho sungah Topa Jesu Calvary mualtungah a ki khaina, tua munah a ompih Tonu leh nungzui John kiangah Topa Jesu in a kam vaikhakna, hi lai ah na Nu om hi. Hi lai ah na ta om hi ci a akam vaikhakna thu ih mu, ih za hi. Ih Pawlpi in tuni pen alungkham, alunggim, a sinkham Tonu pawini hong bawl sak aa, ih Pawlpi sungah hih Tonu lungkham sinkhamna pawi pen kumzalom (14) pek panin hong kipanin ki bawl hi. Tua Tonu ii lungkham sinkhamna pen nam (7) (Seven Sorrows of Mary) ki ci hi. Tonu ii lungkhamna nam (7) te ih cih ciangin ama ii lungkhamna khempeuh hi lo a, a diakdiak in ama ii alungsim, alungtang a sukha phadeuh nam (7) a ki ci bek ahi hi. Topa Jesu sihna, ama ii gentheih thuakna lim te ih muh ciangin siangtho ni-nga ni ahi zongin tua hun te in ih khitui luangin ih kap hi. Ahi zongin bang zah takin ih kah hang Tonu lungkhamna cik mah hunin ih ban zo kei ding hi. Tonu zahin lungtang kitam zah dongin ih thuak zo kei ding hi. Tua ahih manin tuni ih nuntakna sungah nang leh kei a dingin, nang leh kei tang dingin, nang leh kei mawhna a dingin gimna thuakin singlamteh pua in thahna, sihna athuak Topa Jesu ii gentheih haksatna te amit mahmah tawh mu in, a lungtang mahmah tawh thuakin, gentheih haksatna athuak Tonu, ama thuakna te phawk siamin tuni nang leh kei nuntakna sungah zong ih mawh, ih khialhna te kisik kik in Pasian deihna zui in Tonu etteh siamin Tonu mah bangin Topa Jesu gimthuakna te a kipat pan alai a tawp dong lungngai den a, Topa deihna bang aa anungta Christian thuzui muanhuai te ih suah nadingin mimal khat kimciatin hanciam ciatni.