Topa Jesu mun ala, limlak siampa in Pope Francis tawh aki muhkhopna hangin alungsim ah apiang thu te gen khia

Tua limlak siampa in Jonathan Roumie ahi hi. Amah in The Chosen cih video sungah Topa Jesu mun la in lim alak pa hi a, Topa Jesu ci-in leitung mun tuamtuam a om mitampite in ciamteh uh hi. Amah in abeisa kaal sungin Vatican ah thungen apai mi te tawh Pope Francis a kimuhkhopna ah va kihel in Pope tawh kiho in Pope Francis ii thupha zong sang hi.

Pope Francis tawh aki muhkhop lai-in,

Roumie : Kei Spain pau siam keng, ahih hang Pope adingin thu hong ngetsak den ing.

Pope : Lungdam ei

Roumie : Nisim, nisim thu hong ngetsak ing

Roumie : The Chosen cih thulu nei video sungah Topa Jesu munah lim kalah khak na hangin ka angtang mahmah hi.

Pope : A hoih ve, Topa Jesu etteh in nungta in la, amah mu-in bia in, amah in lungnopna hong pia ta hen.

Roumie : Lungdam mahmah ei” ci-in a ki-ho na uh Jonathan in gen khia hi.

Amah in aneu tung pankipan Pope tawh aki mukhawm nuam mahmah khat ahi hi. Ahi zongin aneu lai-in tua ama lunggulh tangtung lo hi. Tu in ahih leh tua alunggulh thupha tangtung taktak ta aa, Pope tawh ki maingatin ki ho theihna hun zong ngah hi. Zong ki nui kha in nuam mahmah hi. Thupha taktak hi. Anuihzak huai deuh na in Pope Francis leh The Chosen Video Director Dalla Jenkns te ki ho na hi.

Pope in Director pa kiangah amah Topa Jesu ahih leh nang Judas Iscariot hi ding na hi ve maw ci-in ciamnuih gen uh hi.

Director pa in zong tua a zaih The Chosen Video in Catholic thuzuite leh Vatican ah mitampi in thei uh hi. Kei pen Protestant khat ka hi a, Pope tawh ahi zong, Catholic pawlpi tawh ahi zong kizopna ka nei kei hi. Ahi zongin upmawh lohpi in Pope Francis tawh ka kimuhkhak na in amanpha mahmah thupha khat hi. Pope Francis in kei hong muh phet in hong ciamnuih in, “amah Topa Jesu ahih leh nang Judas Iscariot na hi ve” hong ci aa, ken zong “hi mah” ci-in ka dawng kik hi ci-in a kiho na uh pulaak khia hi.

‘The Chosen’ Video apiang nadingin amasa lam (Part I) in mitampi kisam hi. Hih video adingin sum 110,0000 ki zangin mipi (19000) dong ki hel hi. Part II ciangin sum 1000000 ki zang hi. Hih video pen ‘Angel’ Studio ah ki bawl hi. Leitung mun tuamtuam pan tha hong kipia in midangte zong a et sak nopna uh gen uh hi. Topa Jesu ii nuntakna tangthu pen video in aki lakkhia masa pen hi a, Topa Jesu tawh a ki thei deuh te leh nungzuipite in Topa Jesu thu agen kik nate lakik in a kizaih ahi hi. Part 7 dong zopsuak ding in zong ki gel hi. Lai Siangtho sunga om thu te zong hel ding om lai hi ci-in Studio phuatna ah a ki hel Neal Harmon in gen hi.

Hih Video zaih nadingin hi ci hih leng aki lawm diam, koi cih leng hoih zaw diam ci-in ka kikum zel uh hi. Bang hang hiam cih leh nidang a, a ki zaih Topa Jesu khui te ah Topa Jesu in mihing hihna alak hangin mihing khat takpi bangin ki zaih lo hi. Mawh anei vetlo bangin kizaih hi. Mihing bang mahin limlahna in mihingte lungsim sukha zaw ding hi ci-in Director pa in gen hi.

Topa Jesu mun aa limlak pa in zong ‘ama limlahna ah Pasian ii itna, hehpihna leh theihsiamna te akilat nading, tua thu thum te in Pasian hihna, ngeina khat lah nadingin athupi pen in ka um a, tua ngeina pen mi khempeuh in zui-in tua bangin nungta zo leh leitungin om nop huai mahmah ding hi”ci-in ama muhna gen khia hi.

‘The Chosen’ video in tu in leitung muntuamtuam ah nidanglai a aki zaih, Topa Jesu nuntakna limlahna tawh kibang lo-in alamdang deuhin kizaihin ki lak ta hi. Ama sa lam Part I + 2 te tu in line tawh kizopna ah pau nam (50) tawh man la lo in copy in ki en thei ta a, Part 3 na ahih leh tu in 50% kiman ta in 2022 kumin ki hawm khia zo ding hi cih lametna ka nei uh hi ci-in gen hi.