Innkuan sung a nuamzaw diam cih thu

Kong it thuzui U le nau te, tuni ih ki kup dingin Innkuan thu cih thulu nuai ah innkuan nuntak khuasak zia hi cizaw leh a nop zaw dinghiam cih thu pawlkhat kikum dih ni. 1. Innkuan sungah Nu leh Pa damlai mah napin tate in thu kineisak se lo-in nu le pa mah thudotpi in nei leng 2. Innkuan sungah nopna dahna ih tuah hun ciang khatbek thuaksak lo-in thu kikum diamdiam in a hoih theipen ding gelna nei leng 3. Innkuan sungah a hau deuh leh a zawng deuh ih om sangin sum tuam neih cih om kei leng 4. Innkuan sungah ann nek tuidawn a hun khat nei-in nekhawm diamdiam leng 5. Innkuan sungah nek kim theih ding meh bawl in meh dang kituam bawl sak se dah leng 6. Innkuan sungah nasep khat peuhpeuh nang semin ki cih se sangi nasep kituh in a sem pen hihding hanciam tek leng 7. Innkuan sungah pawlpi biakna tuamtuam ah ih om sangin pawlpi khat sung leh biakna khat sungah om khawm leng 8. Innkuan sungah Pasian zahtakin thungen khawm zelzel leng 9. Innkuan sungah sum zong in mun tuamtuam ah ih pai phial zongin nu le pa mah sum leh paai zek sak leng 10. Innkuan sung thusim leh mite theih ding a kullo thute midangte tungah gengen se dah leng. 11. Pa in zi leh ta tungah itna kip nei-in, Nu in Pa tungah zahtakna nei aa, tate in nu le pa tungah itna, muanna leh zahtakna nei leng. 12. Teeknu in a mo tungah a tapa a it bangin itna nei-in, Mo in zong a nungsang suang lo-in a lawmpa it mahmah a teeknu it pih leng. 13. Mokhak a neiten innkuan sung thudang tampi kikup pih se sangin a mokhak uh a tanu leh a teekte a kilem nading vaihawmpih genpih zaw leng. 14. A thadah leh a uisan mi peuhmah kuamah tawh kilem lo ahih man in innkuan sungah tuabang ih om lohna dingin ki hilh tek leng. 15. Innkuan sungah sum le paai neek leh dawn a hamsat ciangin nang hang hi ci-in ki mawh sak kei leng. Cih kei kong gen theih hi leh a za a ngai a kuamah peuh Topan a hoih lamin a sangsian leh a nuntak pih dingin thupha hongpia kim ciat ta hen. Ka lungdam.