Pasian itna panin sepkhiatna hong piang thei pan hi.

Daily Homily by Rev. Fr. Thomas Tuang (July 3, 2021)

Pasian i up leh um takpi ding, ih up kei leh lah up vet lo ding hi. Bang hang hiam cih leh laisiangtho sungah note in hi nacih te uh hisak unla hilo na cih te uh hikei sak un acih mah bangin tuni Thomas in a up lah hangin a up ciangin a sih dong, a hu bei dong in um suak hi. Tua upna koi pan hong pai hiam? Tua siangtho na koi pan hong pai hiam? Tua muan na koi pan hong pai hiam? cih leh a thokik Topa kiang pan hong pai hi. Thomas in upna angah mah bangin upna sungah a kiciat mah bangin eiten zong ih upna te niam sak lo in Thomas hong thunget sak na tawh umlah lo in Topa tungah um taktak ni. Spiritual Father ih cih kha lam ah pa te in ih kha nuntakna khantoh na dingin bangci in tha hongpia hiam cih leh nisim in laisiangtho te sim ding hang aa, Topa tawh aki nai pen dingin Topa tawh ih kizawp tawntung ding kisam hi. Pasian kammal te lung ngai in, Pasian thu te lung ngai in nungta lehang ei mahmah in Topa hi ding aa Topa tawh kinai ding hi hang cih nagen uh hi. Misiangtho Mother Theresa in,"Thu ih nget ciangin ih um ding aa, ih up ciangin ih it ding aa, ih it ciangin ih sem ding hi," ci hi. Ih sep zawh nading in ih it ding kisam hi. Pasian itna panin sepkhiatna hong piang thei pan hi ci hi. Tua ahih manin eite in thungetna pan kipan ding aa, upna hong khang to in itna khangto ding aa tua panin Pasian aa dingin ih sepkhiatna te hong kilang zo ding hi.