Our Lady of Lourdes

Misiangtho Bernadette Soubirous in Piantit gam, Lourdes khua-ah 1844 kumin suak hi. 1858 kum, February 11 ni-in alawm nihte tawh The Gave River acihna munah singtom dingin pai uh hi. Massabielle cih suanghawm atun uh ciangin alawmte in Bernadette nusia in taisan uh hi. Tawmvei khit ciangin thakhat in huihpi ging bang khat hong gingin suanghawm sungteng hong taang hi. Bernadette in atung lam a ettoh leh Puankang tungah adom mel kawngngak tawh ngakin akhut ah khi atawi, amelhoih mahmah numei khatin akhe ah lingpaak tawh aom amu hi.

Bernadette in hanciamin singlamteh ciaptehna abawlsawm hangin akhutte linggawp ahih manin bawl zo lo hi. Puantual kang tawh numeinu in Bernadette anuihsan khit ciangin amah tawh khikhen khawm dingin sam hi.  Ni thum khit ciangin Bernadette suanghawm ah apai kik leh tua puantual kang tawh numeinu zong hongpai kik hi. Tua numeinu in Bernadette kiangah ni (6) sung tua munah pai-in mawhna sungah kidiah mite a kikhel nading thu angetsak nading leh Siampite in tua munah biakinn khat alam nading genin ci-in vaikha hi.

Tua banah a gei aom luineu pan avanglian tui adawn dingin sam hi. Bernadette in tua munah ni (15) sung pai in mi tul tampi in amah azuih uh hangin kuamahin puantual kang tawh numeinu mu lo uh hi. Bernadette in tua numeinu kiangah amin a dot leh “kei in mawhcilna neilo kumpinu hing” ci-in gen hi. 1866 kumin Bernadette in Charity nungak siangtho sangah lut a, aompih alawmte in ama kiniamkhiatna leh tungsiah thu azuih zawhna te hangin zahtak mahmah uh hi.

Nikhat alawmte in Bernadette kiangah Tonu Maria tawh akimuhna thu dong uh a, Bernadette in “Tonu in leivuite ahemkhia munphiah khat bangin kei hong zang hi. Nasep aman khit ciangin munphiah pen kongkhak liahah kikoih kik hi” ci-in gen hi. 1879 kum, ama kum (35) aphak hun, Khi thungetna anget laitakin Bernadette si hi. 1980 kumin ama luang kisia lo in aom na leh amuk in vantunggam ii nuihmai tawh aom na kimu hi. 1933 kumin Pope Pius XII in Bernadette Misiangtho in tangko hi. Kum sial in mitampi in Lourdes ah pai-in thungetna, vangliatna anei tui adawn dingin leh Pasian kiangpan pumpi leh kha ading thupha tuamtuam ngah nadingin pai den uh hi.

Cinate hong huh thei Nu aw…Kote adingin thu hong ngetsak tan.

Kilemna Kumpinu aw....Ko te adingin thu hong ngetsak tan.