Zehtan hun Nipi masa, Lungdamna Laisiangtho Mt 23:1-12 ungsimna (Feb.27, 2024)

1. Tua khit ciangin mihonpite le a nungzuite’ kiangah Jesu in,
2. “Pharisee-te le lai siangtho siamte in Moses’ tokhom tungah a tu uh hi.
3. Tua ahih manin amau hong hilh khempeuh sem unla, na zui un. Ahi zongin amaute’ gamtat bangin na gamta kei un, bang hang hiam cih leh, amaute in a hilh bangun a gamta kei uh hi.
4. Amaute in van-gikpipi lomhenin mite’ liangko ah a suan uh hi. Ahi zongin tuate khinna dingin a khutme nangawn uh a tangsak nuam kei uh hi.
5. Amaute’ gamtatna khempeuh mite’ mai-ah a kilatna dingin ahih uh hi; bang hang hiam cih leh amaute in a taltang tunga a suan a Lai Siangtho munte uh liansakin, a thunget puante uh a mongteep a sausak uh hi.
6. Pawi khamna sunga uliante’ tutna ah tu nuam uh a, kikhopna innpite ah tutna thupi pente ah a tu nuam uh hi.
7. Van zuakna munte ah zahtakna tawh hopih ding le ‘Rabbi’ ci-a mite’ sap ding a ut uh hi.
8. Ahi zongin note in, ‘Rabbi,(a)’ hong kicih ding na ut kei un, bang hang hiam cih leh note in sia khat bek na nei uh a, note khempeuh unau khat na hi uh hi.
9. Leitung ah kuamah ‘pa’ na ci kei un. Bang hang hiam cih leh vantunga om Pa khat bek in note’ pa ahi hi.
10. Note sia hong kicih ding ut kei un. Bang hang hiam cih leh Christu khat bek in note’ Sia ahi hi.
11. Note’ lakah a lianpen in, note’ nasem ahi ding hi.
12. Amau le amau a kitawisangte kiniamsak dinga, amau le amau a kiniamsakte kitawisang ding hi.