Zakna ding bil a nei peuhmah in za ta hen!

Catholic Nisim Lai Siangtho, Hun Nautaang Nipi Kaal (3) Na, Jan 27, 2021 (WED)

Lungdamna Lai Siangtho (Mark 4: 1-20)

1. Khatvei tuipi gei-ah Jesu thuhilh kipan a, ama kimkotah a kikhawm mi tam lua ahih manin amah tuipi tunga om gunkuang tungah kahto-in a tu hi. 2. Mi honpite in tuipi gei-a leilak ah a om uh hi. Amah in thugentehna tawh thu tampi hilh a, a thuhilhna sungah a genin ah, 3. “Ngai un! Khaici vawhpa in khaici vawh dingin kuankhia hi. 4. Khaici a vawh ciangin pawlkhat lamdungah kia a, vasate hong pai-in tawmin a ne uh hi. 5. Pawlkhatte suangtamna leilak ah kia a, lei a dai manin a po pah hangin, 6. ni suak a, a sat ciangin zung kha zo lo ahih manin a vulpah hi. 7. Pawlkhatte ling lakah a kia hi. Ling kungte khangin ankungte dep gawp uh ahih manin gah zo lo hi. 8. A dang pawlkhatte lei hoihna ah tu a, po-in khang a, a zah sawmthum, a zah sawmguk, a zah za khat dongin a gah hi. 9. Zakna ding bil a nei peuhmah in za ta hen!” a ci hi. 10. Jesu bek a om laitakin, sawm le nihte le ama kim a om adangte in tua thugentehna, amah a dong uh hi. 11. Jesu in amaute’ kiangah, “Pasian’ Gam thuthukte na theihna dingun hong kipia zo hi. Ahi zongin a pualam a om mite ahih uh leh, na khempeuh thugentehna bek tawh kigen hi. 12. Tua bang ahihna in, “Amaute in mu-in tel le-uh, a gamtat uh kikhelin a mawhna uh kimaisak kha ding ahih manin, en en napi-in, mu lo ding uh a, za za napi-in tel lo ding uh hi,” a ci hi. 13. Tua ciangin Jesu in amaute’ kiang ah, “Hih thugentehna tel thei lo na hi uh hiam? Tua ahih leh thugentehna khatpeuh bangci tel theih ding na hi uh hiam? 14. Khaici vawhpa in thu a vawh hi. 15. Lamdunga a kia khaicite in, tua thu a zak phetun Satan va pai-a amaute’ sunga kivawhsa thu a laksak hi. 16. Tua bang mahin, suangtamna leilak a a kiate in thu a zak uh ciangin, lungdamin a sangpah uh hi. 17. Ahi zongin zung kha lo ahih manin tawm vei sung bek a kip uh hi. Thu hangin gimna ahi zongin, bawlsiatna ahi zongin a thuak uh ciangin a puk pahte ahi uh hi. 18. Ling lak a a kiate in thu a zak uh ciangin leitung lunghihmawhna, 19. sum le paii ze-etna le, a dang lunggulhna lutin thu dep gawp a, gah a gah zo lote ahi uh hi. 20. Lei hoihna a a kiate in thu a zak uh ciangin sang uh a, a zah sawmthum, a zah sawmguk, a zah za khat nangawn a gahkhiate ahi uh hi,” a ci hi.

Hih in Topa’ Lungdamna Lai Siangtho ahi hi.