Vantungmi Michael, Gabriel leh Raphael te pawini.

September (29) ni-in, ih Pawlpi in Vantungmi Michael, Gabriel leh Raphael te pawini akibawl ahi hi. Vantungmi te in Angels, Greek kamin Angelus pan hongpai hi a, ‘Pasian sawlte’ cihna ahi hi. Hih Vantung misiangtho te pawini in ih lungngaih nop ah Pasian in mihingte ong bawl ma in Vantung misiangtho te na bawl hi. Vantung misiangtho te abawlna ah abu amang, alian aneu ci-in nabawl hi. Tua lakah khen thumin khen lehang, khen masa ah 3 om a, khen nihna ah nam 3 om in, khen thumna ah nam 3 mah om hi.

Vantung misiangtho te khen thumin nam 3 ta kikhen ahih manin nam (9) pha hi. Amasa in Seraphim cih te ahi zongin, Cherubim cih te ahi zongin, Thrones cih te ahi zongin hih khen masa thum teng pen Pasian ahi bangin nai takin abia te ahi uh hi. Pasian tawh a kinai pen Vantungmi te ahi uh hi. Tua ciangin Pasian ii gelna te atangtung sak ding, adiakdiak in leitung khuavelpi auk ding, a vaan dingin Pasian in aseh Vantungmi te om hi. Tua te in Dominions, Powers, Virtues cih nam 3 te ahi uh hi. Tua ciangin mihingte tawh a kisai phadeuh Vantungmi te nam 3 om in tua te in Principalities, Archangels leh Angels cihte ahi hi.

Principalities te in mun tuamtuam, gam tuamtuam te acing te hi uh a, Archangels te in mihing te, adiakdiak in Dawi mangpa tawh ki do na ah hong cingte ahi uh hi. Angels te in Pasian in mihing khat ciat hong cing hong kem dingin ih suah tung pekpan ong piak misiangtho te hi a, guardian angel ki ci hi. Archangels te thu ih et ciangin Pasian ii asawlte, mihingte nuntakna ah Pasian ii om na, Pasian ii cingna, Pasian ii nasepna, Pasian ii damsakna, Pasian ii hoihna te hong musak te ahi hi. Tua ahih manin Vantung misiangthote pawini ih bawlni in eite in Vantung misiangtho te in Pasian aphat mah bangin tuni in eite in zong amaute tawh a kibangin Pasian aphat khawmte ih hi hi.

Tua hih manin hong cing hongkem vantungmi te tungah lungdam ih koh ding kisam hi. St. Michael, St. Gabriel, St. Raphael te in eite kisapna tuamtuam ah ong huh mah bangin eite ongcing ongkem vantungmi te in zong ih kisapsapna ah, lauhuaina ih tun ciangin, dawimangpa ze-etna ih tuah ciangin anai penin hong huh ahi hi. Tua ahih manin amaute ih pahtawina pen abawlpa Pasian apahtawi ih hi hi cih phawkin tuni hih vantung misiangtho te tawh ki bangin Topa vangliatna, minthanna, hoihna, phatna te Topa tungah om tawntung tahen ci-in Topa tungah lungdamna ako zo te, Topa tungah a ki-nga tawntung te ih hihzawh na dingin han ciamni.