"Tua mite in tawntung gimna a thuak dingin paikhia ding uh a, midikte ahih uh leh tawntung nuntakna ah a pai ding uh hi,”

Catholic Nisim Lai Siangtho, Zehtan Hun Nipi Kaal Masa , (MON). March 2, 2020

Lungdamna Lai Siangtho (Matthew 25: 31-46)

31. “Mihing’ Tapa a vantung mite khempeuh le ama minthanna tawh hong pai ciangin, minthanna tokhom tungah hong tu ding hi.

32. A mai-ah mi namkim khempeuh kikhawm dinga, gancingpa in tuu le keelte a tuam khen mah bangin, mi khempeuh a tuam tuakin hong khen ding hi.

33. Tuute a taklam ah koihin, keelte a veilam ah a koih ding hi.

34. Tua ciangin a taklam-a a omte’ kiangah Kumpipa in, ‘Ka Pa’ kiang panin thupha a ngahte aw, hong pai un, leitung piancil a kipan note’ aadinga kibawlsa na luah ding uh gam hong luah un;

35. bang hang hiam cih leh, ka gilkial laitakin an nong pia uh a, ka dangtak laitakin ka dawn ding tui nong pia uh hi. Khualzin mi ka hih laitakin zin nong do uh hi.

36. Puan ka neih loh laitakin puan nong silhsak uh hi. Ka cinat laitakin nong veh uh hi. Thong ka kiat laitakin ka kiangah nong hawh uh hi,’ a ci ding hi.

37. Tua ciangin midikte in, ‘Topa aw, na gilkial laitak cikin hong mu a, an hong pia-in, na dangtak laitak na dawn ding hong pia ka hi uh hiam?

38. Khualzin mi na hih laitakin cikin hong mu a, zin hong do ka hi uh hiam? Puan na neih loh laitak cikin hong mu a, puan hong silhsak ka hi uh hiam?

39. Na cinat laitak ahi zongin, thong na kiat laitak ahi zongin, cikin hong mu a, na kiangah hong veh ka hi uh hiam?’ a ci ding uh hi.

40. Tua ciangin kumpipa in, ‘Ken a man takpi kong genin ah, note in ka sanggamte ahi hih mi neu pen khat tungah na bawl uh ciangin, kei tungah zong hong bawl na hi uh hi,’ a ci ding hi.

41. Tua ciangin a veilam a omte’ kiangah Kumpipa in, ‘Ciamsiatna a thuak mite aw, kei kiang pan paikhia un, dawi mangpa le ama nungzuite’ aadinga kibawl tawntung meikuang sungah pai un;

42. bang hang hiam cih leh, ka gilkial laitakin an nong pia kei uh hi. Ka dangtak laitakin ka dawn ding tui nong pia kei uh hi.

43. Khualzin mi ka hih laitakin zin nong do kei uh hi. Puan nei loin ka om laitakin puan nong pia kei uh hi. Ka cinat laitak ahi zongin thong ka kiat laitak ahi zongin nong veh kei uh hi,’ a ci ding hi.

44. Tua ciangin amaute in zong, ‘Topa aw, na gilkial laitak, na dangtak laitak, khualzin mi na hih laitak, puan na neih loh laitak, na cinat laitak le na thongkiat laitak cikin hong mu a, hong don lo ka hi uh hiam?’ ci-in a dawng ding uh hi.

45. Tua ciangin kumpipa in, ‘Ken a man takpi kong genin ah, hih mite laka a neu pen khat tungah na bawl loh uh ciangin, kei tungah zong hong bawl lo na hi uh hi,’ a ci ding hi.

46. Tua ciangin tua mite in tawntung gimna a thuak dingin paikhia ding uh a, midikte ahih uh leh tawntung nuntakna ah a pai ding uh hi,” ci-in thu a hilh hi.

Hih in Topa' lungdamna Lai Siangtho ahi hi.