"Topa Jesu Tui Ki Sawpna Pawi" Ni Kha-an vakna

Daily homily by Fr. Joseph Zo Mung (12.1.2020)
Tuni pen Topa Jesu tui a ki sawp a pawi ih bawl hi. Tuisawpna pen Gupkhiatna ngah na ding a hih manin Topa Jesu aa dingin san ding ki sam lo hi. Bang hanghiam cih leh a mah in mawhna nei lo hi. Tuisawpna pen mawhna pan siangtho na hi. Topa Jesu in mawhna nei lo hi mah ta leh eite in ih zuih zia ding lam hong lah na leh John pen Pasian kiang pan hong pai tak tak hi cih tetti a lah na in tuisawpna, Jordan Gun ah ki tuiphum na hong sang a hihi. Tui sawpna ih san ciangin upna kiciam na leh dawi tawh kisai na te paai khia ding cih kiciam na te ih nei hi. Upna ih cih pen thu manthutak khat a um ih hi hi. A hi zongin tua pen mit tawh muh theih pah hi lo hi. Upna ih cih pen mit phial lah bangin nalamdang a pian ciang bek in up ding hi lo hi. Misiangtho te upna en leng bang bang hamsatna thuak ta leh Pasian in kei hong it hi, hong nusia ngeilo hi a ma deih na pen ken zong nial ngei kei ning ci-in hamsatna, dahna, kahna, buaina, nopsak na thuak ta leh Pasian itna sungah a om tentan te a hi uh hi. Pasian tawh ih kizopna ih upna pen ih pilna tawh ih sin na pan in ih theihna sangin gamtat hoih na, nahoih ih sepna pan in ih theihna in ih upna tampi tak hong khang sak zaw hi ci-in Bishop Fulton J shin in hong gen hi. Gamtat hoih ih gamtat na tung tawnin Pasian hongit na ki tel sem sem in tua in ih upna te hong khangsak zaw hi. Tui ih kisawp lai-in ih kiciamna te phawk kik in ih gamtat hoih in gamtatna tawh ih upna te khang sak ciat ni. Topan thupha hongpia ta hen! Amen.