Topa Jesu in siavuan siam pen hi, tuu cing siampen hi.

Luke Laisiangtho pen bang danin kimu thei hiam cih leh amah pen siavuan siam khat ahi hi. Tua ahih manin ama lai-at te ih et ciangin Topa Jesu in siavuan siam pen hi, tuu cing siampen hi, damna angah nuamte, lungsim damna, pumpi damna angah nuamte, mawhmaina angah nuamte in Topa kiangah hong pai-in, Topa kiang hong zuan leh Topa in hong dam sak ding hi. Topa dam sakna na in ih pumpi, ih kha ih hihna khempeuh damsakna hong pia thei pa hi ci-in Luke in hong gen khia hi. Tua ahih manin tuni in damna hong pia, hoihna hong pia, phatna hong pia khua vak hong musak , na hoihte hong musak thei, na hoih te hong ngaihsunsak  thei Topa tuni in a thak in lungdam ko ni. Mailam ah Topa in khua vak namanphate, thu dik thuphate, ei te adingin thuhoih thuphate  ih muh theih na dingin, mite tungah lamlakte ih hih theih na dingin, mite tungah khuavakte ih hih theih na dingin, lamlak mante, lamlak hoihte, thu dik nuntakna tawh a nungtate ih hih theih na dingin tuni in khuavak ahi Topa beelin Topa kiang pan thuphate tawh ei te in kalsuanin mainawt ni.