Topa Jesu in nungzuipite a sap bangin eite zong hong sam hi.

Tuni, Peter leh nungzui dang pawlkhatte in a upna uh hangin nalamdang tampi mu uh hi. Nga bek amatna nalamdangte hi lo-in, mi damsaknate ahi zongin, kikhel saknate ahi zongin, mitampite mohlum (5) leh Ngasa tawn (2) tawh avakna nalamdangte zong mu uh hi. Ei te in zong Topa ii thuphate Topa ih upna tawh a mu thei te ih hi hi. Ih ngaihsut leh ih phawk leh Topa hongpiak thupha tampi tak om hi. Ih upna hangin ih ngah thupha tampi tak om hi. Tua te tuni ngaihsunpha kik in Topa citaktak leh Topa deihna bangin ih zuih zawh nadingin hanciam ni. Kiniamkhiatna leh hanciamna, Topa ii nasepna te ah ei te in ih huh ding kisam hi. Theresa of Lisieux in “Topa Jesu in eite tawh nasem khawm nuam hi. Ei te lo-in bang mah sem lo hi” ci-in hong gen hi. Tua ahih manin ama kiangah ih nget ding, ih thum ding, ih suan ding pen kisam hi. Ei te ii ih ngetna, ih muanna, ih thumna te hangin kha tampi taktein suahtakna ngah ding hi cih phawkin tuni in Peter te, nungzui dangte Topa Jesu in asap mah bangin ei te zong nisim, naisimin ama nungzui ding, ama deihna a kem ding, ama thulehla tawh anungta ding, khat leh khat aki-it ding, a ki huh dingin Topa Jesu in hong deih hi cih phawkni.