Topa Jesu in midangte tung siatna tawh thuk kik ding hong deihlo hi.

Daily Homily by Rev. Fr. David Sut (June 14, 2021)

Pasian hongpiak thuphate thusimlo aa ih om khak ding lauhuai mahmah hi. Banghang hiam cih leh Laisiangtho masa sungah Misiangtho Paulu in note in nangah, nasan thupha te pen awlmawh loh in omkei un ci-in hong hilh hi. Eite in ih nuntakna abeisa hunte lungngai lehang damlohna, haksatna, buaina tampi tak om mahta seleh Pasian hong piak thupha te sim lehang simzawh loh in tam mahmah hi. A haksatna tuni dongin ih gengen hangin tuni ciang dong ih gentheih nading nuntakna hongpia zong Pasian ahih manin Pasian thupha hang ahi hi. Tua ahih manin Misiangtho Paulu in ama nuntakna ah buaina haksatna, bawlsiatna te tampi thuak mah tase leh tuni in thuzui mite tungah agen na ah Pasian thuphate a phawk den nading uh ahi hi. Haksatna buaina te ih tuak hangin Pasian thupha te phawk ding hong deih hi.

Tuni lungdamna laisiangtho sungah Topa Jesu in eite in thuk kik ding hong deihlo hi. Mite in hong bawlsiat leh hoihlohna tawh thuk kik ding hilo aa, a hoihna thupha tawh ih thuk kik ding hong deih lam ih phawk ding kisam hi. Ih leitung nuntakna ah hong bawlsia te hoih lohna tawh thuk kik lehang hih leitungah mit kim, khut kim, bil kim, khe kim kua mah ki om nawnlo ding hi. Tua ahih manin eite in bawlsiatna, sim mawhna ih thuak leh hoihna tawh ih thuk ding kisam hi. Topa Jesu in zong Matthew 18: 8-9 na ah, " Note khut ahi zong khe ahi zong note siat nading hong tun aa leh tua te satkhia zaw un," hong ci hi. Khut kim, khe kim in hell khuk tun sangin khut kimlo khe kimlo in vantung gam tun ding hoih zawlai hi hong ci hi. Tua ahih manin ih nuntakna ah hong sim mawh, hong bawlsia te tungah hoih lohna tawh athuk kik hilo in hoihna thupha thunget sakna tawh thuk kikna anei apia zo te ih hih ding kisam hi. Tua mah bangin Topa Jesu mahmah zong kibawlsia in thahna athuak hangin agal te aading thungetsakna lungdamna thupha apiakna tawh thuk kik hi.