Topa Jesu lo adang leitung nate ih ki-uk sak hiam?

Daily Homily by Rev. Fr. Paul Muan Lian (June 4, 2021)

Tuni laisiangtho te in bang hong gen hiam cih leh Topa Jesu in Pasian ahih na, kumpi ahihna, eite Topa ahih na hong thei sak hi. Amah in eite kumpi eite Topa ahih manin eite tagah bangin hong nusialo ding aa, ih haksatna ih gentheihna ih lungman na te panin hong donlo, hong huhlo leh hong panpihlo in omlo ding hi cih tuni in eiten lungmuan na ihngah nadingin tuni laisiangtho in eite tha hongpia hi.

Tuni in eite kua ih ki-uk sak ih hi hiam? Ih nuntakna sungah Topa Jesu ih ki-uk sak hiam? Topa Jesu lo adang leitung nate ih ki-uk sak hiam? Neih le lam, sum le pai, min le vang, khamtheih guihtheih te ih ki-uk sak kha hiam cih ih kingaih sut ding ahi hi. Tuni in Topa in ih nuntakna amah ih uk sak ding, ih nuntakna sungah amah eite Topa, eite kumpi pa ih suahsak ding, ih innsungah ahi zong ih lungtang sungah, ih sepna khempeuh te sungah amah ih ki-uk sak ding Topa in eite hong deih hi cih tuni laisingatho in eite hong phawk sak hi.