Topa Jesu ii sapte, anungzuite in kuate hiam?

Tuni lungdamna Laisiangtho sungah Topa Jesu in Matthew kiangah ka nung hong zui-in acih ciangin amah in zong thakhat thuin na zuipah hi. Hih thu en le hang Topa Jesu ii a sapte, anungzuite in kuate hiam cih leh akigingsa a om te ahihna thu ih mu hi. Tua banah cinate ading bekin siavaun kisam hi cih zong tuni Laisiangtho sungah ih mu hi.
Tua ahih manin eite in ih natna in koi mun hiam cih ih theih ding kisam hi. Matthew in ama natna thei ahih manin mawhneimi, siahdonga aom na pan Topa Jesu in asap ciangin kikhel pahin amawhna pan suakta hi. Eite khat ciatin zong ‘Biakna sangin hehpihna ka deihzaw hi’ ci-in Topa Jesu in agen mah bangin Pasian hehpihna in kuate tungah tung hiam cih leh alungsim tawngah kiniamkhiatna aneimi, Matthew bangin kikhel nopna lungsim anei mite tungah Pasian it na tung hi cih ih theih ding kisam hi.
Tua a hih manin eite khat ciat in zong lungsim siangtho nei-in, Pasian deihna zuih nopna lungsim nei lehang Matthew mah bangin Topa Jesu tawh kimu dinga, amah in eite hong samin hong zang ding hi. Matthew in zong Topa Jesu nung azuih ciangin ama ii asep ngei khempeuh nusia in anuntakna athakin kipuahpha in Topa Jesu deihna bangin zui-in a om mah bangin eite in zong Topa Jesu nungzui in ahoihlo ih gamtatna te nusia in athak a ih kipuahphat zawh na dingin hanciam ni.