Topa Jesu in eiten thukhenna ihthuak dinglam hong theikhol sak hi.

Daily Homily by Rev. Fr. Joseph Zo Mung (June 10, 2021)

Tuni lungdamna laisiangtho sungah Topa Jesu in eiten thukhen na ih thuak ding lam limtakin hong theikhol sak hi. Hih laisiangtho sungah bangci hiam cih leh "Note dikna in laisiangtho siam te leh Pharisee te dikna sangin a hoih zawk kei leh vantung gam sungah nalut thei peuhmah kei ding uh hi," ci hi. Tua ban ah " A sang gamte kiangah a heh te peuh mah in thukhen na athuak ding uh hi," ci hi. A sang gamte kiangah kiman na neilo ci in ako mi peuhmah in uliante mai ah thusitna athuak ding uh aa, mihai ci-in asim mawh mi peuhmah in hellkhuk sungah khulna athuak ding hi ci hi. Mi a sim mawh mi peuhmah hellkhuk sung tung ci hi. Biakpiakna pia dingin biakna taumai ah napai laitak na sang gampa tawh nakilem loh lam natheih leh nasang gampa nang tungah hong lungkim kei leh biakpiakna nusia inla kilemna bawl photin ci-in zong kilemna tawh kisai athupitna biakpiakna sangin kilemna athupitna pen hong theisak hi. Tua banah bangci hiam cih leh naliau sumteng napiak khit matengin thong sung pan nasuakta ngei kei ding hi ci hi, tua acih nopna in Topa Jesu in eite tungah thusitna hong nei ding hi, bangci banin thu hong sit ding hiam? mawhna thelkhat zong aneilo mite aliau sum cih ciangin mawhna dan i loh siang matengin vantung gam tungtheilo ding ci-in hongthei sak hi.

Tua ahih manin hih thusitna te enle hang, (1) Diktakna aneilo mite, midangte asim mawh mite, mi tawh akitawng kilemna aneilo mite khempeuh in thusitna thuak ding aa, tua bek thamloh amaute biakpiakna pen Pasian in sanglo ding hi ci-in tuni laisiangtho in teltakin hong hilh hi. Tua ahih manin Pasian in ihzuih ding leh zuihloh ding hongpiak thukham le thukhunte en leuleu lehang nambat khat na-ah ihzuih dingin Topa Jesu in bang hong ci hiam cih leh na Topa Pasian pen na lungsim khempeuh, na kha khempeuh, na ngaihsutna khempeuh tawh na it in ci-in Pasian pen nambat khat aa ih it ding hong deih in hih thukham lakah alian pen hi ci-in hong hilh hi. Tua khit ciangin thukham lakah (2)na bang hiam cih leh na pumpi na it bangin midangte na it in ci hi. Tua thukham namnih ih zawh leh Pasian it ding, midangte it ding tua hi leh pen eite in thukhenna, mawhsakna panin ih suakta ding hi.

Ei leitung mite ih hih leh thukham lak pan alian pen nambatkhat pen kizo mahmah hi. Pasian tawh kilem nadingin thungen ding maw, biakpiakna pia ding maw, piakkhiatna tawh nahoih sem ding maw cih pen mitampi ten zuizo mahmah hi. Ahi zongin ih zuih zawhloh in nambatnihna napumpi na it bangin midangte tungah na it in cih hicitciat hi. Itna neilo, lungsim hoih neilopi in na kisem thei ahih manin lungsim hoih neilopi in thu ih nget hang, lungsim hoih neilopi in biakpiakna ih paik hang Pasian in hong sang lo ding hi. Tua ahih manin kilemna thupi masa aa, innkuan sungah ki-it, kilemna a om nading, ih sepna peuhah lungsim hoih tawh ih sep ding tua hi leh Pasian in ih biakpiakna hong sang ding hi. Tua ahih manin thukham alian pen zaw ih zuih ding baihin anihna zaw pen atamzaw in kizui khalo thei hi. Tuni in eite leitung mite in bang zuiding ih hi hiam? Ih liau sumin mawhna thelkhat zong ihneih kei nak leh vantung aki tung ding hi aa, tua ih mawhnate pan ih kisik kik ding kul aa, mawhna daan lohna ih bawl kul aa, kilemna ih bawl kul aa, itna ih neih kul hi. Tua ahih manin tuni eite khempeuh in leitungah itna nei-in Pasian itin midangte tungah itna nei lehang, ihveng ihpam mikhempeuh tawh ki-it, kilemna neilehang leitungah nopsakna om dingaa, tua pen vangam malem ih hiding hi. Thukhenna ih thuak nawnkei ding hi. Tua ahih manin eite khat ciatin thukhenna ih thuak loh nangin Pasian itin mite tungah itna nei-in, Pasian itna leh midangte tungah itna ih neih zawh nang, kilemna ih neih zawh nang, kilemna ih bawl zawh tawntung nang hanciam ni.