Topa Jesu in eite hongsapna thu

Catholic Nisim Lai Siangtho, Hun Nautaang Nipi Kaal (1) Na, Jan 11, 2021 (MON) ni, Tuni Topa Jesu in eite hongsam hi. Amah in ama tungah upna ih neihna in Aman eite tungah kicin na thupha hongpia ding hi ci-in kha-an vakna Rev. Fr. Joseph Zo Mung tungpan. Lungdamna Lai Siangtho: Mark 1: 14-20 14. John a kimat khit ciangin Jesu Galilee gamah hong pai a, Pasian’ lungdamna thu tangko-in a hilhin ah, 15. “A hun hong tung ta hi. Pasian’ Gam hong tung dek ta hi. Kisikkik unla, lungdamna thu um un,” a ci hi. 16. Galilee tuipi dungah Jesu a pai laitakin, ngabeng mi ahi Simon le a sanggampa Andrew-te in tui sungah ngeen a khuh laitak uh a mu hi. 17. Jesu in amaute’ kiangah, “Ka nung hong zui un. Keimah in note mi a mante kong suaksak ding hi,” a ci hi. 18. Amaute in zong thakhatin a ngeen uh nusia-in Jesu’ nung a zui pah uh hi. 19. Tua panin tawmkha a pai khit ciangin, Zebedee’ tapa James le a sanggampa John zong gunkuang sungah ngeen khui-a om a mu hi. 20. Amah in amaute sam pah a, amaute in a pa uh Zebedee le a thacialte gunkuang sungah nusia-in ama nung a zui uh hi.

Hih in Topa’ Lungdamna Laisiangtho ahi hi.