Topa Jesu in damnopna tawh amah azuante cik mah hunin nial ngeilo hi.

Topa Jesu in damnopna tawh amah azuante cik mah hunin nial ngeilo hi. Tuni Lungdamna Lai Siangtho sungah ahi zongin, Isaiah Lai Siangtho sungah ahi zongin, James Lai Siangtho sungah ahi zongin Pasian ii vangliatna, adiakdiakin bengngongte, mit mulo te, a pau thei lo mite Topa in ama vangliatna tawh dam sak kik hi cih ih mu thei hi. Isaiah in ih sunglam dam lohna tampi hong lak hi. Tua te in bang teng hiam cih leh mite tungah ih hoih zawhlohna te, mite ih hehpih theih lohna te, mite ih it theih lohna te zong dam lohna hi. Tua hi a, ih lungsim a damloh ciangin mite ki-it thei lo hi. Hatzat loh ding pi ki haza hi. Tua te in lungsim lam damlohna, ih sunglam dam lohna hi. Tua te Topa in damna hong pia nuam hi. Ei ii dam mahmah ih kisakna te ah zong damlohna tampi om thei hi. Tua te in kha nuntakna sungah hong nawngkaisak damlohna te hi. Mawhna, khilhna, hoihlohna, siatna, thuman lohnate zong damlohna vive hi. Tua kha lamdamlohna te hong damsak thei, Pumpi damlohnate hong damsak theih mah bangin ih kha natnate zong hong dam sak thei Topa phawkin tuni Lai Siangtho sungah ih zakte ei te in a thakin ngaihsunpha in Topa ii vangliatna, Topa ii hih theihna tungah kinga in ih damlohnate khempeuh Topa hong dam sakin, ka hoihlohna khempeuhte uh hong hoihsak kikin, ka cih theihlohna te uh, ahoih ka sep khaklohna te uh ah ahoih kasep zawh na dingun, dikna, manna, cihtakna te tawh ka nuntak zawh na dingun hong huhin ci-in Topa tungah kiniakkhiatna tawh thu ih nget ding ahi hi. Tua hi leh Topa deihna tawh kituakin ei te in Pumpi, Kha, Lungsim cidamin hi leitungah ih dam sungin Topa tawh kigawm khawmin nikhatni ciangin, ih nuntakna a bei ciangin Topa tawh nungta khawm thei ding hi hang. Tua dingin hi leitungah ih nuntak sungin hong damsaklo te, hong cimawh sak te, hong ki deidante  ih pelh zawh na dingin Kha Siangtho thupha ngenni. Kha Siangtho in thupha hong pia leh tuni a bengngongte Topa khutme in a lawn ciangin a dam mah bangin Topa vangliatna ei te tungah hong tung leh ei te in ih damlohna khempeuh, ih pumpi damlohnate bek tham lo-in, ih lungsim, ih kha damlohna te zong damna ngah ding hi hang cih athakin phawkni. Topa in ei ii nuntakna hong kempa, hong damsakpa hi cih phawkin ama tungah nungta ni.