Topa aw, ka upna hong khangsakin.

Lk 17 : 1 – 6
Tuni Pasian in amah tawh ih kinai theih nading thu hong hilhna thu ih mu hi. Pasian in nahoih napha te ih it theih a, ih gamtat ding hong hilh hi. Pasian in nahoihlo, na phalo te mudah a, ahoih lo na te ih nusiat ding ong deih hi. Na hoih na pha te ih sep leh Pasian tawh ki nai ding hanga, ahi zongin aituam lungsim te, hazatna lungsim te ih neih ciangin Pasian tawh hong ki gamla sak hi.
Eite nuntakna ah khat leh khat ih upna te, ki kimlo, ki banglo ding hi. Upna neu te tungah kampau, gamtatna tawh lampial na ding a lak hi lo-in, upna a khan nading, Pasian tawh kinai nading na a sem zo te ih hih ding thupi hi. Ei mah leh ei mah zong nungzuipi te bangin Topa aw, ka upna hong khangsakin ci a thu ih nget den ding, ei mahmah zong Pasian tawh kinai a, midangte zong upna lian aneih semsem nading, Topa Jesu kiang hong zuat semsem theih nading, Topa Jesu tawh ki pumkhat nading in eite in abawl zo, a sem zo, a huh zo te ih hih zawh nang hanciam ciatni.
Tua ahih manin eite in upna nei in hi le hang, Pasian sungah, mite tungah mawhmaina te pia zo in, mite tungah thupha te bawl zo in, Pasian thu sungah upna picing na te nei-in, nitawpni ciang zong Topa Jesu tawh nuntak tawntungna luah khawm ding hi hang.