Topa’n vangliatna leh thuneihna te amaute tungah apia hi.

Tuni Lungdamna Laisiangtho sungah cinate dam sak ding leh Pasian gam lungdamna thu a tangko dingin Topa’n amaute akuankhia sak hi cih thu ih za hi. Topa Jesu hunlai in tu hun bangin munkhat leh munkhat kikawmna aol hi lo a, ami mahmah pai-in tangko na aneih ciang bekin ama deih thu atangko thei pan ahi hi. Tuni Topa Jesu in ama nungzuipi te tungah lungdamna thu atangko dingin vangliatna leh thu neihna te na pia-in dawite hawlkhiat theih nading, sep theih nading, bawl theih nading panmunte napia hi cih tuni Lungdamna Laisiangtho sungah ih mu thei hi.
Hi munah a thupi mahmah khat in mikhat bek in tangko leh ama kam ama aw pen ama tangko na mun bekah tung dinga, mitampi tak tungah tangko leng tua lungdamna thu mitampi tak tungah ki zel ding hi. Tua ahih manin gualzawhna, matutna thu sim in sep theih khempeuh khatguakin sem ding cihna hi lo a, nasep tawh akituak mite teelin sepna hizaw hi cih ih mu thei hi. Miman, munman tawh nasem ding cihna hi. Lam khat panin panmun piakna, panmun hawmna, sepkhopna te tawh gualzawhna kingah hi.
Topa Jesu in anungzuite asawl ciangin bang mah keng sak lo hi. Bang hang hiam cih leh vanzang ding, tangzang ding, mazang ding, manlang ding Topa’n deih hi. Khat veivei leitung thuleh la, neihleh lamh leh vanzat te in Pasian thu tangko na ah hong nawngkai sak kha thei hi. Tua ahih manin ‘far and fast’ agamla ah tung ding, manlang takin tung ding, tua lungdamna thu mikhempeuh in a theih nading in Topa Jesu in anungzuipite lam na lak hi cih thu ih mu hi.
Tuni Topa Jesu in anungzuipi te tungah apiak vangliatna leh thuneihna te in mikhat kia ading bek hi lo a, minam khempeuh, mikhempeuhin suahtakna, hotkhiatna, lungnopna, sinnopna, pumpi taksa, lungsim, kha cidamna angah nadingin zatkhiat, zekkhiat, hawmkhiat dingin Topa’n deih hi cih thu te ih mu thei hi. Tua ahih manin tuni ih nuntakna sungah Topa Jesu in nungzuipi sawmlenih te sawl khia in lungdamna thu atangko sak mah bangin nang leh kei zong tuni Topa in ama gam leh lei adingin ma apang ding hong kuan khia sak hi. Topa hong piak vangliatna, thuneihna te zang siamin ama minthan nading leh mite phattuam nading in a zangsiam dingin nang leh kei mimal khat kimciat Topa’n thupha hong pia ta hen.