Thumanna leh cihtakna.

Lk 16 : 9 – 15
Tuni Topa Jesu in thumanna leh cihtakna thu tawh kisai hong gen hi. “A tawmno ah a thumante pen a tam ah zong thuman ding uh a, a tawmno ah a citaklote a tam ah zong citak lo ding hi” ci hi. I Christian nuntakna ah thuman ding leh cihtak ding pen a thupi mahmah ahi hi. Thumanna leh cihtakna a ton khop kei leh Christian nuntakna man ki nungta theilo hi. Banghang hiam cih leh, thumanna omlo in cihtakna man om theilo a, cihtakna omlo in thuman tawh nuntak den ding baih lo hi.
Mother Theresa nuntakna en leng ama cihtakna ki lim muh mahmah hi. Culkata khuapi sung a om mizawng teng kai khawmin an vak hi. Cidam lote pua in a inn ah kem in zatui tawh bawl hi. Nikhat ni nih nasep hilo hi. Nitampi kha tampi, kum tampi nasep, khantawn nasep ahi hi. A sih dong nasep ahi hi. Haksa mahmah hitaleh a cihtak man, a hanciam man bekbek in lawncinna a ngah ahi hi.
Ama cihtakna hangin, a sihma ahi zongin a sih khit ahi zongin pahtawina min phatna tuamtuam ngah toto a, Misiangtho nangawn suakin, tangthu manpha mahmah hong gelh khia hi. A ciapteh huai ama kammal khat in, “A neuno khat na sem phial zongin itna tawh sem in,” ci hi. Cihnopna ah I sep bangbang itna tawh citak takin sem ding cih na hi. Tua ahih manin, I Christian nuntakna ah thuneu thulian cilo in cihtakna leh thumanna tawh I sep zawh na dingin han ciam ni.