Singlamteh gualzawhna pawini

September 14 ni simin ih Pawlpi in Exaltation of the holy Cross ci-in a Siangtho Singlamteh gualzawhna pawi ih bawl hi. Singlamteh ih cih in bang hiam cih pen Christian te tangthu ahi, Israel minamte khang tangthu sung en leng nakpitakin ki mu thei hi.
Cross- Singlamteh ih cih pen a pai phei khat, a pai to khat tawh khaktan ahih manin a khiatna in a hoihlo, a et lawmlo siatna a piang sak, ka mit dong cih bangin a hoihlo in khiatna nei hi.
Tua ahih manin mi gilote, mawh nei mite daan a ki piak ciangin singlamteh tungah ki khai hi.
Cross – Singlamteh pen haksatna in ki mu hi.
Israel mite ii a singlamteh in bang hiam?
Igypt gam ah sila in omin bawlsiatna thuak uh hi. Ahi zongin upna tawh amaute’ singlamteh na pua tentan a hih manun a singlamteh uh a pua zo teng Caanan gam tung uh hi.
Topa Jesu ii puak singlamteh
Roma galkap ten khautep tawh satin lingkual lukhu khusak, singlamteh pua sak in teipak tawh dawtin thahna thuakin tua khit the amah thokik hi.
Tulaitakin eite ii ih puak singlamteh in bang hiam?
Natna satna, anduh gilkialna, khat leh khat kimuhdah kibawlsiatna, nupa kaal sungah cihtakna neihlohna leh ki lem lohna, ki ukna maan om lo a hih manin ukna buluh galkapte ii bawlsiatna cih bangin mikimin a ki bangle a gik mahmah singlamteh ih pua ciat hi.
Upna, lametna, itna ngaihna a nei te in singlamteh apuak uh ciangin lawptakin pua tentan uh hi. Lungkia lo-in pua uh hi. Tu lai takin PDF tee n ni. Pasian thu omlo zong om thei mai ding uh hi. Ahi zongin thuman thutak deihna tawh lawptakin a singlamteh uh pua hi.
Sacrifice – Itna tawh ki pumpiakna omlo in kua mahin singlamteh pua zo lo uh hi.
(Mt 16: 24) na sungah Topa Jesu in na singlamteh puain ka nung hong zui un ci hi. (Mt 11: 27) sungah vangik pua aa agim mite aw ka kiangah hong pai un ci hi.
Tuni Lungdamna Lai Siangtho (Jn 3: 13- 17) sungah Moses in gamlak ah gul a khai bangin mihing tapa hong kikhai ding hi. Amah a um mi peuh mahin nuntakna ngah ding hi ci hi.
Topa Jesu in singlamteh lawptakin apuakna tawh gualzawhna a ngah mah bangin ei Christian te in zong ih singlamteh ciat lawptakin ih puakna tawh gualzawhna ih ngah ding hi.
Ei Christiante in Topa Jesu in a gualzawhna bek apahtawi a phawk te hi lo-in, a gimthuakna, a sihna leh a thawhkikna (gualzawhna) pawi a bawl ih hi hi. Tuni singlamteh ii gualzawhna pawi ah ih singlamteh ciat Topa Jesu tawh lawptakin pua khawmni. Ih Singlamteh te Topa Jesu tawh lawptakin pua khawmin amah tawh gualzawhna pawi abawl khawm zo te ih hih zawh nangin ih biak Topa Pasian in thupha hongpia ta hen. Amen.