Rev. Fr. Joseph Zo Mung tungpan kha-an vakna

Lungdamna Lai Siangtho: Lk. 24:13-35 13. Tua ni mahin amaute’ lakah nih, Jerusalem khuapi panin tai sagih bang a gamlatna Emmaus kici khua neu ah a pai uh hi. 14. Tua banga a pai laitakun amaute in tua thu piangsa khempeuh a kikum uh hi. 15. A kikup laitakun Jesu in va nai a, amaute tawh a paikhawm hi. 16. Ahi zongin amaute in Jesu ahih lam a theih lohna dingun a mit uh a mangsak hi. 17. Amah in amaute’ kiangah, “Na pai kawmkawmun bang thu kikum na hi uh hiam?” ci-in a dong hi. Amaute mai mialin a dinkhawl uh hi. 18. Tua ciangin amaute’ lakah Cleopas min nei pa in, “Jerusalem khuapi ah hawh napi-in tu laitak a tua khua-a thu piangte a theilo nang bek na hi hiam?” a ci hi. 19. Jesu in amaute’ kiangah, “Bang thu piang ahi hiam?” ci-in a dot ciangin, amaute in, “Nazareth mi Jesu’ thu ahi hi. Amah in Pasian’ mai-ah ahi zongin, mi khempeuh’ mai-ah ahi zongin, a pauna le a sepnate ah vang a nei hi. 20. I siampi makaite le makaite in amah a sihna dingin pia uh a, singlamteh tungah a that uh hi. 21. Ahi zongin kote in Israel minamte a tankhia dingpa amah hi ding hi, ci-a ka lamet uh ahi hi. Tua tham loin hih thu khempeuh a pian zawh ni thum hi ta hi. 22. Tua tham loin ka numeite uh pawlkhatin lamdang hong sasak mahmah uh hi. Tuni zingsang tungin amaute hanah va hawh uh a, 23. ahi zongin ama luang a mu kei uh hi. Amaute hong ciah kik uh a, amah nungta hi, ci-a amau tunga a gen vantung mite a muhna thu hong gen uh hi. 24. Tua ciangin kote’ lakah mi kimkhatte hanah va pai uh a, numeite’ gen bang tektekin a mu uh hi; ahi zongin amah a mu kei uh hi,” a ci uh hi. 25. Tua ciangin amah in amaute’ kiangah, “No mi haite aw! Kamsangte’ hong genkholhsa thu khempeuh upna ding haksa na sa uh hi. 26. Christu in hihte khempeuh a thuak masak kul phot-a, tua khit ciangin ama minthanna sungah a lut pan ding hilo ahi hiam?” a ci hi. 27. Tua ciangin Moses a kipan Kamsangte khempeuh in amah tawh kisai-in Lai Siangtho sunga a gensa thu khempeuh amah in amaute’ tungah teltakin a hilhcian hi. 28. Amaute a paina ding uh khua a naih uh ciangin, Jesu a paisuak lai ding bangin a kineih hi. 29. Ahi zongin amaute in, “Kote’ kiangah hong taam phot in. Ni niam ta-a, ni a tum ding hi ta hi,” ci-in nakpi-in kho uh ahih manin, amah pai-in amaute’ kiangah a taam hi. 30. Amah in amaute tawh an kuang a um khawm ciangin, khomun la a, thupha a piak khit teh khomun balnenin amaute a pia hi. 31. Tua ciangin amaute a mit uh kihonga amah a theician uh hi; tua ciangin amau muhna panin amah a mang hi. 32. Amaute in, “Amah tawh lampi ah tonkhawmin kiho-a, Lai Siangtho hong hilh laitakin i lungsim honglawng hilo ahi hiam?” ci-in khat le khat a kikum uh hi. 33. Tua hun laitak mahin amaute dingkhia pah uh a, Jerusalem khuapi ah a ciah kik uh hi. Sawm le khatte tawh a lawm a gualte kikhawm a om amaute in a mu uh hi. 34. Tuate in, “Topa thokik takpi a, Simon’ kiangah kilang hi,” ci-in a gen uh hi. 35. Tua ciangin tuate gel in lampi a thupiangte le Jesu in khomun a balnen laitakin a meel a theihcian patna uh thute a gen uh hi. Hih in Topa' Lungdamna Lai Siangtho ahi hi. #KalayDiocese, #RVATedimchinservice, #RVA, #Homily, #Corona, #Virus,