Pasian umin ama kiangah ngen peuh leng apiang theilo khat beek omlo hi.

Daily Homily by Rev. Fr. Paul Muan Lian (May 28, 2021)

Tuni lungdamna laisiangtho in eite hong hilh thu in eite gah hoih, gahpha ih gah nading thu leh mite aading phat tuamna ih bawl nading thu hong hilh hi. Pasian in mihing in hong bawlna, hong nuntaksakna, thupha hong piakna, hongitna, hong maisakna, hongtat khiatna te in ngimna, lametna leh adeihna om hi. A lamet bangin ih nuntak zawhna ding gah i gah zawh nading ih hanciam leh thu i nget ding kisam hi cih tuni lungdamna laisiangtho in eite hong phawk sak hi.

Ih nuntakna sungah eite ih tuak khak thu te ah i sep ibawlna sumzonna, paizonna, i zin i ciahna ah ih ngimna te atangtung ding lamet bangin hong piang ding i deih kim ciat hi. A hi zong in tua bangin hong piang loh ciangin eite hehin, khasia in, thangpai in, lungkia in ih om thei hi. Ahi zongin Topa in eite bang hong gen nuam hiam? Tua bang ih tuah khak hangin ih lametna bangin apiang loh hangin Topa Jesu in eite Pasian upin ama kiangah zuan in thungen peuh lehang na khempeuh apiang thei hi, alem kik thei hi cih tuni eite hong hilh hi. Tuni lungdamna laisiangtho sungah eiten Topa Jesu ii nasepna, gamtatna te eiten ih mu hi.

Tuni lungdamna laisiangtho in eite hong hilh nop thu in Topa Jesu in ama lametna bangin eite ih nuntak theih nadingin, ama kiangah ih zuat tawntung theih nading in, amah tawh akipawl ih hih theih nading in, ama hong tel bangin ih nuntak theih nading in eiten mawhmaisakna ih neih kul hi. Mawhmaisakna lungsim siangthona tawh Pasian zuan in thungen le hang na khempeuh a piang thei hi cih tuni Topa in eite khat ciat tha hongpia in lam hong lak hi. Tua ahih manin eite in ama hong tel mah bangin, hong tatkhiat mah bangin gah hoih, gahpha te gah in mite aading khuavak lam hoih, lampha mite ih hih theih nading in tuni in Topa hong hilh, lam hong lah, hong gen thu te lung ngai kawm in nisim nuntakna sungah mite aading in gah hoih, gahpha mite ii hih kim ciat zawh nading in Pasian in thupha hongpia ta hen.