Pasian ukna gam taktak ih cih in bang hiam?

Daily Homily by Rev. Fr. Raphael Khuppi (June 19, 2021)

Kua mah in To nih na sem theilo hi ci-in Topa Jesu hong genna ah eiten Pasian na asem ding ihi hi. Tua ahih manin Pasian munah hong piak sak pa Pasian bek mah koih in ama piangsak na te amau mun ciat ah koih a, tua Pasian piangsak na te zangin Pasian aminthang sak te, Pasian alian sak te ih hih ding tu-in hong phawk sak ahi hi. Pasian min ih liat sak theih nading in Matthew laisiangtho alian guk aneu sawmthum le thum na ah zong hih bangin thu hong hilh hi,"Pasian ukna gam leh ama thuman na, ama dikna zong masa un. Tua hi leh adang na te zong hong kipia beh ding hi," ci hi. Eiten in hih laisiangtho tungtawn in bang thei thuah lai ih hiam cih leh leitung na te tawh buai masa lo zaw in Pasian ukna gam, Pasian deihna gam tawh ih buai masak ding kisam hi. Khat veivei ciangin eite in leitung na te tawh buai masa in Pasian ih nung ngat in amah ih phawk khak loh tak ciang tua na te abei ciangin na khempeuh abei hong suak hi. Tua ahih manin leitung na te ih deih leh apiangsak pa Topa, Pasian ukna gam Pasian deihna bang hiam cih zong masa ding hi hang.

Tua ahih leh Pasian ukna gam taktak ih cih in bang hiam? Rome alian sawm le li, aneu sawm le sagih na sungah Pasian ukna ih cih pen nekna, dawnna leh guak nopna te hilo hi. Ei leitung mite in sumle paai anei, ane zo, alam zo te pen Pasian thupha ngah ci-in ngaih sun kha thei hi hang hilo hi ka cih na hilo in Pasian ukna gam taktak, Pasian thupha angah taktak te in bnag hiam? Misiangtho Paulu in," Thuman thutak, kilemna leh khasinagtho sungah alung kim thei, alung dam thei te in Pasian ukna sungah anunta te, Pasian thupha angah te ahihi," ci-in na gen hi. Tua ahih manin thuman thutak tawh nungta in eima sungah kilemna nungta sakin tua kilemna te hawmkhia kik in leh khasinagtho sungah atawn tung in alungkim thei, alungdam thei mite ih hih aa leh Pasian ukna sungah a nungta te ih hi aa, Pasian pen to takpi aa anei te suak in ama deihna azui te hih ding hihang. Tuni in Topa Jesu in hong hilh na ah To nih na kua mah in sem theilo ding acih mah bangin Pasian piangsak na te Pasian mun ah koih lo in Pasian mah ama mun ah koih in ama min lian sakin, ama min thang sakin, ama ukna zong masa ni tua hileh adang na te khempeuh zong eite tungah athuap athuap in hong kipia beh ding hi.