Pasian thuman thutak nuntakna kammal zuih ding tavuan nei hi hang.

Tuni Laisiangtho masa en lehang eite in Pasian deihna bang ih zuih leh nuntakna ngah dinga, ei mihing si leh sa deihna bang ih zuih leh sihna thuak ding hi hang ci-in Misiangtho Paul in kician takin ong gen hi. Eite in ei ii si leh sa deihna zuih ding tavuan nei lo hi hang. Pasian thuman thutak nuntakna kammal zuih ding tavuan nei hi hang. Tua ih tavuan neihna bangin nungta lehang Pasian in nuntak tawntungna hong pia ding hi cih ih mu thei hi.
Tua ahih manin Kha nuntakna, Kha cidamna, lungsim cidamna te ih ngah theih na dingin ei mihingte deihna khempeuh sangin Pasian deihna te masak zawin, Pasian kammal te lungngai in nuntakpih lehang ih Kha dam, ih cidam in Kha nuntakna zong ngah ding hi hang. Tua hi a, Pasian deihna in bang hiam cih, kan a, tel a, ama thu te zui aa anuntakpih zo te hi zaw lehang Pasian thu sungah nuamsa in Pasian tawh nuamsa tawntung ding hi hang.
Tuni Laisiangtho te lungngai le hang na hoih napha te sem a, mite tungah thupha bawl a, Pasian thukham te tawh anungta zo semsem te ih hih zawh na ding hanciam ciatni.