Pasian muanna leh kiniamkhiatna tawh ih bawl piakkhiatna te tungah ih Topa lungkim hi.

Mk 12 : 38 – 44
Tuni Lai Siangtho teng ih et tak ciangin bang mu ih hiam cih leh Pasian muanna leh kiniamkhiatna tawh upna takpi tawh ih bawl piakkhiatna te tungah ih Topa lungkim in lungdam mahmah hi cih tuni ih mu hi.
Misiangtho Ambrose in bang na gen hiam cih leh kiphatsakna, ki liatsakna tawh ih piakna te hangin Pasian lungkim lo zaw a, zahtakna, itna leh ki niamkhiatna tawh ih piakna te hangin ih Pasian lungkim in lungdam hi ci hi.
Mother Theresa a dam lai-in khat vei khutdawh ngenpa khat tawh ki ho hi. Khutdawhngenpa in “Mother aw, mi khem peuhin nang tungah banglo khat teitei huhna, na nasep na dingin hong pia a, kei zong ka hih theih sunsun in huhna ong pia nuam ing ci hi. Mother Theresa in ngaihsun in sang leng lah, ama nek ding om nawn lo ding, sang kei leng lah amah khasia ding ci-in angaihsut khit teh lungdam mahmah ei ci-in tua khutdawhngenpa huhna sang hi. Tua pa piak huhna pen Mother Theresa in leitunga mi minthang mahmah khat ii piak huhna sangin manpha ka sa zaw hi ci hi.
Tu laitakin ih thuak gentheih haksatna te pen Topa ap-in, Topa adingin, Pasian adingin lungsim zawngkhal te in thupha ngah ding hi. Amaute pen Topa gam angah ding te ahi hi ci-in Topa’ a gen mah bangin tua ih lungkham, ih sinkhamna te Topa ap-in, meigongnu bangin genthei in, cimawhin ih lungsim pathau hi mah ta se leh ih neih sunsun ih hunte, ih thatang te, ih neih ih lam te Topa ading in a piakhia zo te hi leng abei thei lo thupha te tawh Topa’ hong dim kik ding hi ci-in tuni tha la ciatni.