Pasian in kei tungpan bang deih hiam? Kei bangin hong zang nuam hiam cih ngaihsun ni.

Tuni Lungdamna Laisiangtho sungah Topa Jesu in zan tawntung a Pa tawh ki ho-in thu anget khit teh nungzuipi (12) te a teelna thu ih mu hi. Bang hangin nungzuipi te teel hiam cih leh Pasian in ama minam dingin ateel Israel mite pen Pasian minam a kici ngiat hi-in, Jacob tapa (12) te in Israel minamte ii a pupi te ahi uh hi. Topa Jesu hun ciangin Israel minam thak dingin Topa Jesu in Jacob tapa (12) te bulphuhin nungzuipi (12) te na teel hi.
Tua bangin a teel ma-in Topa Jesu in thungenin a Pa tawh ki ho phot hi. Tua hi a, Topa Jesu leitung hong pai na in a Pa’ deihna bang a zui ding ahih manin a Pa tawh ki ho in thungen phot hi. Tua khit ciangin nasem pan hi. Tua mah bangin ei Christian te zong na ih sep ma-in Pasian tawh ki ho masa ding, thungen masa ding, ih sep ih bawl dingte Pasian ap ding, Pasian aw nang deihna tawh kituak in ka sep theih na ding hong huhin, kei hong zangin, Kha Siangtho Pasian aw kei hong ompih inla, ka lungsim ngaihsutna te ong cing ong kem inla, nangma deihna bangin ka sep zawh na dingin hong makaihin, lam ong lakin ci-in thu ih nget ding Topa’ hong deih hi.
Topa Jesu in nungzuipi te a teel ciangin mipil, misiam, mi minthangte na teel lo-in a hanciam mite na teel hi. Amaute in lawpna nei uh hi. Topa Jesu in ama sap mite panpih in ama vangliatna tua mite tungtawnin kilangh sak hi. Tuni ih phawk dingin Pasian in kei tungpan bang deih hiam? Kei bangin hong zang nuam hiam cih ngaihsun ni. Ih neih bang bang tawh khat leh khat a kihuh diamdiam dingin Topa’ hong deih hi.