Pasian kammal na ngaih leh thupha hong luang ding

Upna mit tawh enin, kiniamkhiatna, lametna tawh Pasian kammal na ngaih leh thupha hong luang ding hi.
Topa Jesu in kikhopna inn te ah thu a gen tak ciangin mite in ama pilna, ciimna, siamna te leh a thugen te hangin lamdang sa uh hi. Ahi zongin ama sanggam, beh leh phung te, a Pa Joseph khut siampa, a Nu Mary te hangin hi pa in hih pilna siamnate koi pan ngah a hi hiam ci-in etneuna tawh ama thugente sang zo lo ahih manun, amau upzawhloh muan zawhlohna hangun ama khangkhiatna Nazareth khua ah na lamdang tampi bawl lo hi ci-in tuni Laisiangtho sungah I za hi.
Taksa damlohna hangin mihingte nuntakna sungah a kisam mahmah ahi mit, mit damlote pen siavuan saima te in agamla amu thei lo te leh a nai amu thei lo te ci-in nam nihin na khen hi. Upna thanemna hangin zong thupha a neu alian, anai a gamla a ki mu kha lo tampitak om hi. Upna neu semsem leh thupha zong neu semsem, tawm semsem cihna hi. Upna khang semsem leh thupha lian semsem, khang semsem, na lamdang Pasian vangliatna ki mu semsem cihna zong ahi hi. 
Pasian vangliatna, dam sakna, na lamdang I muh theih na dingin nang leh kei nuntakna sungah upna in hong tonpih ding thupi hi cih tuni Laisiangtho in hong theisak nuam ahi hi. 
Nazareth mite in bang hangin na lamdang tampi mu thei lo uh ahi hiam? Topa Jesu in ama khua ah a khuapih mite lak ah na lamdang tampi a bawl loh na in upna a om loh man hi. Tua upna mit hong khaktan thei te in bang hiam? Mi khat peuhpeuh tungah neu et na, ama innkuanpihte tungah ahi zongin, amaute nuntak na ding zon na te ah ahi zongin, amaute pilna, neih leh lam te hangin ahi zongin tua te paulamin mikhat tungah neu et na I neih ciang ama tung pan hong luang khia thei hamphatna thupha ki tan lawh hi cih zong I theih ding thupi hi.
Tua ahih manin nang leh kei nisim nuntakna sungah pumpi taksa natna tuamtuam te leh lunggimna, lungkhamna tuamtuam te, kha natna te pan taksa damna, kha damna I ngah theih na dingin bang kisam hiam? Mesiah gumpa honpa tungah upna muanna kisam hi. Tua upna muanna te tawh ama kiangah zuan leng damna, siangthona angah ding nang leh kei Pasian tanu tapa te I hi ding hi.
Tua ahih manin upna mit tawh en in, kiniamkhiatna, lametna tawh Pasian kammal ngai-in I nuntak leh tua tungtawn in Pasian thupha tampi hong luang ding hi. Tua thupha I san theih na dingin nang leh kei upna picingte I suah theih nading tuni I zak Laisiangtho tungtawn in a telsiam ding Topa’n mimal kim ciat thupha hong pia ta hen.
#RVATedimChinService, #KalayDiocese, #Homily,