Pasian gam ah alian ih suah nop leh bang kisam hiam?

Pasian gam ah alian ih suah nop leh bang kisam hiam? Pasian kammal te ih zuih ding, Pasian kammal te ih nuntakpih ding kisam hi. Topa Jesu hun lai-in mitampi tak te in Pasian thu leh la te za uh hi. A nuntakpih zong tampi tak om hi. Mipil misiam tampi tak te in Topa Jesu thu za uh hi. Ahi zongin a lungtang uh ah kem lo hi. Tua hi a, tuni in Topa Jesu ii thu, Pasian kammal te a nuntakpih te in thupha ngah uh hi ci hi.
Thupha taktak pen Pasian kammal ngaihna pan hong pai hi cih tuni a thakin ih phawk phatphat ding ahi hi. Tonu Maria val in Pasian angai siam, a zui siam omlo ih hih manin tuni in a Nu apahtawi Topa Jesu in eite zong ong pahtawi theih na dingin Pasian kammal zui-in, Pasian kammal te tawh ih nuntak ding pen ei lam pan nakpi takin ngaihsun in ih nuntak ding, ih hanciam ding ahi hi.