Pasian in eite khempeuh zong khuavak dingin hong deih hi.

Tuni Lungdamna Laisiangtho sungah khuavak thu tawh kisai ih za a, Pasian in eite khempeuh zong khuavak dingin hong deih hi cih ih mu thei hi. Ih nuntakna sungah khuavak (mei) om kei leh bang mah a kisep theihloh mah bangin eite in zong ih nuntakna sungah mite phattuamna apia khuavakte ih hih ding thupi hi cih ih mu thei hi. Pasian deihna bangin na ih sep ciang Pasian in ong ompih in mipite’ panpihna tawh kinungta kigualzo thei hi cih Laisiangtho masa sungah ih mu thei hi. Eite ih nuntakna sungah khuavak ih hih ding, ci banga ih al ding thupi hi.
Jn 8 : 12 na ah Topa Jesu in ‘Keimah in khuavak ka hi hi. Kei hong zuite khuamial sungah pai ngeilo dinga, nuntakna khuavak ngah ding uh hi’ Topa Jesu in ong ci ngiat hi. Tua ahih manin Topa Jesu nung ih zuih leh khuavak sungah gamta, khuavak sungah nungta ding hi hang. Topa Jesu ih zuih kei leh khuamial sungah cimawh, dongtuakna, haksatna, sihna tawh anungta dingte ih hi hi. Eite in tuisawpna Sacrament ih san ciangin Pasian ii tanu tapa te ih suaka, leitung ii khuavak, asiangtho puan bangin kang a, mite tungah khuavak atangsak ding te ih hihna te zong ki mu thei hi.
Misiangtho Anthony in bang ci hiam cih leh ‘ni hong tangin khua hong vak ciangin Sabuai tunga hita leh na khat peuh tunga om leivui themte ih muh theih mah bangin Misiangtho te nuntakna te ih et ciangin zong eite ii kicing lohna, ih thanemna, ih mawhna te ih ki mu thei hi. Ei ii nuntakna sungah ih kicing lohna te, ih thanemna te ih ki muh kei leh Misiangtho te nuntakna te lungngai lo, ih et-teh lohman ahi hi’ ci hi. Tua ahih manin eite in zong khuavak ih hih nop leh khuavaka ih tang nop leh Topa Jesu etteh ding hi hang. Bang hang hiam cih leh Topa Jesu in kei mah in leitung khuavak ka hi hi hong ci ngiat hi. Ih nuntakna sungah khuavak taktak ahi, Topa Jesu tawh ih kikop kei leh tang zo lo ding hi hang.
Late 199 : 105 na ah ‘Na thu in ka khete’ aadingin meivak hi a, ka paina lampi khua hong vaksak hi’ a cih mah bangin eite in Topa Jesu kammalte lungngai in ama thu ih zuihna tawh ih nuntakna ah ih paina lampite khua hong vak a, mite tungah khuavak ci banga a al sak zo te hi ding hi hang. Tua ahih manin eite in mite tungah thu hoih thupha, nahoih napha ih sepna tawh ih khuavakte a tang sak zo semsem, ih al na te a hawmkhia zo semsem khuavak tate ih hih zawh na dingin hanciam ciatni.