Pasian in eite hong it mahmah hi.

Daily Homily by Rev. Fr. David Sut (June 7, 2021)

Tuni lungdamna laisiangtho sungah mihampha, mi nuamsa cih te pen leitungah haksatna atuaklo te hi peuh mah lo hi. Tua mite in haksatna atuak, bawlsiatna athuak, thahna athuak leh gilkial dangtaakna atuak te ahi uh hi. Mite tungah hehpihna leh itna anei thupha abawl te ahi uh hi. Eiten haksatna tuak veve napi in, Pasian itna ngah veve napi in, mite thuak bang thuak napi in, lungsim hoih lungsim pha ngaihsutna hoih te ih neih kei leh tua te in thupha hong suaklo ding hi.

Tua ahih manin idah ikahna te leh ilunglengna te izawhna te in Pasian tawh hong kinaisakna ahih ding, Pasian ih itna ikhang sak semsem ding tua hih leh ih nuntakna in thupi in mi nuamsate leh Pasian hehpihna thupha angah ding te hi ding hihang cih tuni lungdamna laisiangtho sung pan tha la ding hi hang. Pasian in eite hong it mahmah hi. Eite tha hong pia hi. Laisiangtho lui sungah Pasian in Isarel mite it mahmah hi. Egypt gam pan in Cannan a paina ah aki annek tuidawn, tui leh Manna Moh te napia in na vak hi. Tuni in eite Topa Jesu in ama Pumpi ama Sisan tawh hong ompih hi. Misiangtho Augustine in thu ih nget ciangin Pasian eiten a ho hi hang aa, Laisiangtho ih sim ciangin Pasian in ei hong ho hi. Missa biakpiakna te ih neih ciang ahi zong khat le khat kikhawm in thu ih nget ciang Pasian eite laizang ah hong om hi. Tua hi-in Pasian in eite hong ompih tha hongpia den hi. Tua ahih manin eite khat le khat zong haksatna atuak, annek ding aneilo, gal hangin atai buaina atuak tampi om hi. Khat le khat iki huhna iki itna tawh Topa Jesu ii mihoih, mipha, mi nuamsate ih hih zawh nading hanciam ciat ni.