Pasian deihna banghiam cih hoihtak kantelin inuntakpih ding Topan honghilh nuam hi.

Daily Homily by Rev. Fr. John Mang (June 9, 2021 )

Tuni lungdamna laisiangtho sungah Topa Jesu in Pasian thupiakna, Pasian thukhamte zuihna nuntakpihna leh midang khempeuh ten zong zahtakin itin azuih theih na dingin na asem dingin nang le kei hong zawn hi cih laisiangtho sungah ih mu hi. A tamzawin ih nuntakna te sungah Pasian thukham, Pasian thukhun ih cih nak leh a hoih lam aa angaihsun sangin a sialam aa angaih sun kitam zaw hi. Pawlkhat te bangin thukham acih limlim aza nuamlo zong om thei mawk mawk hi. RC te ii na Cannan Law mahmah uh mudah ing aci zong om mawk hi. Ahi zongin Pasian deihna in bang hiam cih tuni hoih tak aa, tel kan in inuntak pih ding Topan hong hilh nuam hi.

Teel tuam Isarel minamte aading in thupiakna namsawm/thukham namsawm in Moses laibu bu nga te sung pan hi aa, tua pen Pentateuch zong kici in Torah zong kici hi. Thupiakna namsawm te hilh cian nate aki gelh hi aa, tua sungah nisim nuntakzia ding hilhna Pasian in amite apiak aitna lahna hi cih ih muthei hi. Ahi zongin Topa Jesu hun lai in Script ih cih laisiangtho siam te in tua thupiakna namsawm panin hilh cian na hong bawl tak ciangin atemneng in hong gelh tak ciangin namsawm panin zuih ding, tan ding 613 bang hongsuah ahih manin Topa Jesu in amaute namawh sak thei zel aa, mipite aading in vangik asuan tawh na kibang uh hi ci-in natai thei zel hi. A taktakin Topa Jesu deihna in bang hiam? Pasian thupiakna ih cih pen thuman thutak hi-in ama hong itna, ama hoihna, ama siangthona sung pan hong luangkhia ahih manin thukham ih cih in itna hi. Thupha hi. Mihingte suahtakna ih ngah nading hi. Nuntakna picing ih ngah nading hi cih tuni lungdamna laisiangtho tungtawn pan in Topa Jesu in nang le kei hong theisak nuam ahi hi.

Tua ahih manin tua thupiakna, tua thukhamte pen it ding, zui ding, zahtak ding bek tham loh in ikiim, ipam aa omte itu ita te, ilawm le gual te, midang te hilh sawn ding theisak ding, zahtak sak ding tua in tuni nang le kei Pasian in hongpiak ih hakkol ih vaipuak khat hi cih ih phawk ding ih deih hi. Topa Jesu in tua Pasian thupiak/thukham te zahtakna in Pasian zahtakna amah pibawlna bekthamloh in ama nisiangtho te zahtak ding, ihnu ihpate pibawl ding, Pasian hongpiak hih mihing nuntakna mahmah zong zahtak ding, ei nuntakna leh ihveng ihpam te nuntakna zahtak ding hi. Mi min zahtak ding hi. Tua bang aa nuntakna in Pasian deihna thukham hong kipat khiatna, thukham ii hong pattahna hi cih tuni hong thei sak nuam ahi hi. Tua ahih manin tua thukhamte ih zuihna hangin Pasian in thupha huhna, hehpihna, tha le ngal tampi tak hong guan hi. Tua hehpihna hongpiakna te in bang ding hiam? Pasian it bangin it ding, Pasian kampaute kampau ding, Pasian deih bangin deih ding, Pasian in nang le kei mawh hong maisak bangin mite mawhna maisak ding, Pasian ngaihsut thute ngaih sunsun ding, Pasian thukhen mah bangin hehpihna tawh thukhen ding, gamta kampau ding tua in Pasian hong sapna hi cih tuni lungdamna laisiangtho sungah Topa Jesu in hong hilhna thuthukte ahi hi.

Tua ahih manin tuni nang le kei ih Christian nuntakna te sungah thupiakna, thukham, thukhun ih cih te in bangci muh ih hiam? Ih lungtang sungah bangci puak ih hiam? Ih ngaihsutna khuak te tawh bangci ngaihsut ih hiam? cih tuni athakin ih phawk kik ding, ahoih lam in mu ih hiam? Ahih kei leh asia lam in mukha ih hiam? Sim mawh bawlkha ih hiam? Ih zui kei kha hiam? Midangte ih hilh kei kha hiam? tuni ih vaipuak lian mahmah hi cih ih phawk ding hi. Tua ahih manin Pasian deihna in bang hiam cih leh tua thukhamte zahtakna, tua thukhamte picin sakna hi. Salan la 119na sungah tua thukhamte Pasian in hongpiakna adeihna in ih lungsim puakzia ding hong hilh hi. Bangzah takin nathupiakna deihin it kahihiam cih leh tuate in sun tawntung ka lungngaihna, ka ngaihsutna ahi hi naci hi. Tua ahih manin Pasian thupiaknate, thukhamte, thukhunte zuihding tanding te nisim ih nuntakna te sungah lungngai ngaihsun in Pasina deihna bang hiam ci aa azong tawhtung nang le kei Pasian tanu tapa te ih suahna tawh midang te tungah zong hilhna lamlahna tawh ama gam atangzai sak Pasian gam alam zo Pasian deihna azui tanu tapa te ih suah ding tuni laisiangtho in hong hilh hi.