Nuntak tawntungna ngah nading in bang kisam hiam?

Hauhna pen lauhuai mahmah sese hi. Pasian ukna, Pasian gam tun nadingin hauhna leh vangliatna te iplahna leh deihna te in ong khaktan pahpah thei ahih manin tuni Topa Jesu in mihaute vantunggam tun ding hamsa hi a ci ahi hi. Laisiangtho sung ih et tak ciangin Topa Jesu tawh a kimu kha te, Topa Jesu tawh a kituak kha te, Topa Jesu kiang azuan te pen lungdamin, cidamin, kipakin a ciah kik vive te hi. Ahi zongin tuni mihau khangnopa pen Topa Jesu kiang pan tawntung nuntak na ding lampi dongin Topa Jesu in zong ahoih penpen, a picing penpen leh amanpha penpen ding gen in hilh hi mah ta se leh amah pen ki zo zo-lo in ciah kik hi.
Topa Jesu thupha ngah kha lo hi. Lungnopna ngah kha lo hi. Lungdam kipakna ngah kha lo hi. A tawpna ah Topa Jesu nungzui suak zo lo hi. Tua pen ih ciapteh ding tuni Laisiangtho ii ong hilh ahi hi. Ahi zongin (Mk 1 : 3, Mk 8) na sungah Topa Jesu tawh a kituak a, Topa Jesu azuan a, Topa Jesu a beel te alungdam leh a cidam leh a maitai sa in a ciah lo kua mah om lo hi. Ih lungdamna, ih thupha ngahna, tawntung nuntakna a khak tan thei bang hiam cih leh ih neihsa te tungah ki-ngak luatna, Topa Jesu ii nungzuihna, vantung gam lam sangin neih leh lamh, sum leh paai te ii nungzuihna ahi hi. Lam khat panin huaihamna ahi hi.
Tua ahih manin ih thupha ngah ding hong khak tan ahi, leitung neih leh lamh te, huaihamna te nusia in Topa tawh ki mu in Lungdamna Laisiangtho sungah Topa tawh a ki mu mi te lungdam kipak in a ciah kik mah bangin eite zong Topa kammal tungtawnin Topa Jesu tawh kimu in ih natna te pan damna, ih lauhna te pan lungmuanna, khamuanna leh tawntung nuntak nopsakna te ih ngah na dingin kikhopna, thukham zuihna, thungetna, sehsuah piakna ciang bek hi lo-in Topa upna tak tawh ih kiim ih paam ate khual zo a, Topa ih itna tak tawh midangte it zo a, apicing Christian nuntakna tawh nungta zo in ei bek hi lo, midangte vantunggam a tun theih na dingin kongpi te a hong zo te ih suahzawh na dingin ih biak Pasian in mimal khat ciat thupha hong pia ta hen.