Nuntak tawntungna ka luahna dingin bang ka hih ding hiam?

17. Jesu a paikhiat laitakin ama kiangah mi khat va tai-a, a mai-ah khukdinin, “Sia hoih aw, nuntak tawntungna ka luahna dingin bang ka hih ding hiam?” ci-in a dong hi.

18. Jesu in ama kiangah, “Bang hangin kei a hoih hong ci na hi hiam? Pasian simloh a hoih khat beek om lo hi.

19. Nangmah in Pasian’ thupiakte na thei khin zo hi. Mi na that kei ding hi. Numei le pasal mawhna na bawl kei ding hi. Mi’ na na guksak kei ding hi. Zuauthu teci na pang kei ding hi. Mi na khem kei ding hi. Na nu le na pa zahtak in,” a ci hi.

20. Amah in Jesu kiangah, “Sia aw, tua thu khempeuh ka neu lai-a kipan ka zui khin hi,” a ci hi.

21. Jesu in amah enin it a, “Na khat na kisam lai hi. Pai-in, na neihsa khempeuh zuak inla tua sum mizawngte pia in. Tua hi leh vantung ah na manpha na nei ding hi. Tua khit ciangin hong pai inla ka nung hong zui in,” a ci hi.

22. Amah in hih thu a zak ciangin, a mai khing a, a dahsa-in a paikhia hi. Bang hang hiam cih leh, amah in neih le lamh tampi a nei hi.

23. Tua khit ciangin Jesu in a kim a pam enin a nungzuite’ kiangah, “Mi haute’ aadingin Pasian’ gam sungah lut ding bangzah takin haksa ahi hiam!” a ci hi.

24. A nungzuite in Jesu’ thugente lamdang a sa mahmah uh hi. Ahi zongin Jesu in amaute’ kiangah, “Tate aw, Pasian’ gam sungah mi haute a lutna ding haksa mahmah hi!

25. Mi hau khat Pasian’ gam a lut ding sangin kalaoh khat phim bilvang ah khum ding a baihzaw hi,” a ci hi.

26. Tua ciangin amaute in lamdang sa mahmah uh a, “Tua bang ahih leh, kua in hotkhiatna ngah zo ding ahi hiam?” ci-in a kikum uh hi.

27. Jesu in amaute enin, “Mihingte’ aadingin hi theilo mah hi; ahi zongin Pasian’ aading ahih leh na khempeuh hi thei hi,” a ci hi.

28. Peter in ama kiangah, “En in, kote in ka neihsa khempeuh uh nusia-in nang kong zui uh hi,” a ci hi.

29. Jesu in, “Ken a man takpi kong genin ah, kei hang ahi zongin, lungdamna thu hang ahi zongin a inn, a sanggampate, a sanggamnute, a nu, a pa, a tate le a lote a nusia peuhmah in,

30. tu khang hunin bawlsiatna tawh innte, sanggampate, sanggamnute, nute, pate, tate, lote a zah za khat ngah loin omlo dinga, nung ciangin hong piang ding hunah zong nuntak tawntungna ngah lo-in omlo dibg hi.