"No hong langpang lo peuhmah note tawh a kipawl ahi hi”

Catholic Nisim Lai Siangtho, Hun Nautaang Nipi Kaal (26) Na, September 28, 2020

Lungdamna Lai Siangtho (Luke 9: 46-50)

46. A nungzuipite in amaute’ lakah kua lian pen ahi hiam, ci-in khat le khat a kisel uh hi. 47. Jesu in amaute ngaihsutna thei a, naupang khat samin ama kiangah a koih khit ciangin, 48. “Keima min tawh hih naupangno a sang peuhmah in, kei zong hong sang ahi hi. Kei hong sang peuhmah in kei hong sawlpa zong a sang ahi hi. Bang hang hiam cih leh, note’ laka a neupen in a lianpen ahi hi,” a ci hi. 49. John in, “Topa aw, nangma min tawh mi khat in dawite a hawlkhiat ka mu uh hi. Amah in eite hong zui hilo ahih manin ka kham uh hi,” ci-in a gen hi. 50. Jesu in, “Tua pa kham kei un. Bang hang hiam cih leh, no hong langpang lo peuhmah note tawh a kipawl ahi hi,” a ci hi.

Hih in Topa' Lungdamna Lai Siangtho ahi hi.