Nangin thuneute ah muanhuai na hih manin thu tampi nang kong uksak ding hi.

Tuni Lai Siangtho in eite bang hong gen nuam hiam cih leh ei mimal khatciat tungah Pasian ii hong piak talent om hi. Tua Pasian hongpiak thupha, talent te ih khansak ding ahi hi. Ih ngah thuphate, laihilh siam te in lai hilhna, neihlehlam neite in midangte huhna cih te sem leng hang ei ii pilna, neihnate hong khang semsem ding hi. Tuni Lai Siangtho sungah Topa Jesu in a neite kipiakbeh dinga, aneilo te tungpan a neih sunsun nagawn kilaksak kik ding hi ci hi. Ahaute hau behbeh dinga, azawngte zawng semsem ding hi ci hi. Apuatham in ngaihsun le hang bang hangin tua ci ding hiam ci-in ih ngaihsun kha thei ding hi.

Ahaute hauhna ahang om hi. Cihtakna hang, hanciamna hang, tavuan theihtheihna hang, na khat peuhpeuh sepna ah Pasian thuphate ngaihsutna hang hi. Pasian thupha azang siam lote a ngahsa nangawn mang kik ding hi. Thupha ngah gegu aa, azanglote angahsa thupha nangawn mangkik ding cihna hi. Tua ahih manin ei khatciatin Pasian thulela te ih zak ciangin ih khangsak hiam? Ei zak bek tawh ih maisak hiam? Pasian kammal ih zak ciangin kikhel ding kisam hi. Atawm penin gamtat hoihna ding, mawhna pelhzawh nading, siatna pelhzawh nading, Christian khat ii tavuan ih zawh nading thupi hi. Pasian in a kibanglo in ei khat ciat tungah tavuan hong pia hi.

Tua tavuante ei khatciatin ih zawh ding kisam hi. Ih sepna peuhah hanciamna, cihtaknate ih neih leh lawhcinna, ih nasepna te ii a gahte ngah ding hi hang. Tuni Lai Siangtho sunga talent 5 leh talent 2 angahte in amau siam pen na tawh hanciamin nasem uh hi. Citak uh hi. Amau hanciamna, cihtakna te hangin agah ngah uh hi. Phatna ngah lai hi. A neupen thu ah citak, hanciam na hihmanin aliante hong ki-ap ding hi cih zah dongin pahtawina, muanna ngah lai hi. Pasian muan ding thupi hi. Mite ii muan ih suah leh Pasian muan zong suak ding hi hang. Pasian adingin amuanhuai mi suak ding hi hang. Tua bangin Pasian muan mi ih suakma in mihingte ading amuanhuai mi ih suah zawh nadingin tuni Lai Siangtho in hong phawksak hi, hong hilh pha hi. Tua ahih manin Topa mai ah tavuan azote, ei hihna ciatciat ah tavuan a zo aa, alawhcing aa, a hanciam zo dente ih hih nadingin Topa Pasian in thupha hong pia kimciat ta hen.