Na neih bangbang tawh lungdamna thu tangkona ah panpih in.

Topa Jesu in Lungdamna thu atangkona kum thum sungah khua khat khit khua khat, munkhat khit munkhat khualzin kawikawi hi. Tua banga azinna ah a nungzuipi sawmlenihte thamlo in numei honkhat in zong zui hi.
Hih numei honte pen mun tuamtuam pan hong kikaikhawm uh ahi hi. Pawlkhat pen mihau, milian innkuan sungpan hi-in, pawlkhat pen numei paktat te sungpan ahi hi. Pumpi damlohna, lungsim damlohna aneite zong kihel uh hi. Tua te sungpan Mary Magdalene in Topa Jesu tawh a kimuh ma in anuntakna sungah buaina tampi aphu kha khat ahi hi. Topa Jesu in ama sung pan dawi sagih hawlkhia hi. Sihna pan a thokik Jeseu amu masa pen nu ahi hi.
Joanna pen Kumpi Herod’s ii sum kempipa’ zi ahi hi. Kumpi huangsungah sumnei pen, ahaupen khat ahi hi. Herod kumpi huangsungah a om te limlim in Jesu pen apimuh lo, thupi a salo te vive ahi hi.
Susanna pen mihau khat ahi hi. Hih pianzia a kibanglo, nuntakna akibanglo numei te pen bangin gawmtuah a, kimusak ahi hiam? Kilawmtatna piangsak hiam? Amaute in bang hang in Topa adingin kipiakhia hiam? Banghang in citakna tawh Jesu nungzui uh ahi hiam?
Hih numeite akikhelsak, apiangthaksak pen Jesu mahmah ahi hi. Amaute in nungzuipi sawmlenihte bangin teeltuamna angah hi lo ahih manun kisialhpih ding, kisaktheihpih ding neilo uh hi. Hamphatna lamen, munlezaa lamen in Jesu nung azui hi lo hi. Lungdamna thu leh Jesu nuntakna in amaute’ nuntakna a sukhak manin Jesu adingin nasep a om bangbang lawptakin sem uh hi. Jesu in adeih bangin a zattheih dingin aneih bangbang uh, aneih sunsun uh hong tawi uh hi.
Nungzuipite ahih leh kua lianzaw, kua neu zaw, kua thunei zaw, kua zaa lian zaw cihtawh buai uh hi. Athanem mihing ih hih manin mi in ei ading na hongsep sak leh i ut hi. Hong kimasak, hong kipibawl leh I ut hi. Mite’ na sepsak ding ahih leh kilawplo in I nungkik nuam hi.
Kiniamkhiatna tawh mite ading na a sem, itna tawh akipia khia Topa Jesu a etteh, hih numei honte tu-ni Laisiangtho in na pahtawi in minphatna pia hi.
I theihsa mah bangin Jew te ngeina ah pasal te ukna nuaiah numeite a om hi. Numei te pen ki enneu ngiat hi. Jew Rabbi te, akikhopna innte uh ah mipi maiah thu agen uh ciangin numei thu limlim genkhia ngeilo uh hi. Ahihangin tu-ni Laisiangtho sungah I zakmah bangin Jesu in lungdamna thu atangkona ah azinna ah numei honkhat zong akihel ding adeih hi. Jew mi te in numei te nawlkhin ta se leh Topa Jesu in pawlbawl hi. Ei te in zong hi bangin itna hong lak Topa tungah lungdam ko kawmin leh mikhempeuh tungah it te khahkhia in ih neih bangbang tawh Pasian ading na asem khawm zo te ih suahzawh nadingin Topa in ei te khat ciat thupha hong pia ta hen.