Na khat peuhpeuh ih sem dinga, ih ngimna, ih tupna te atangtun masiahin ih lungsim puakzia ding.

Tuni Lungdamna Laisiangtho sungah Topa Jesu in nungzuipi te ii tatzia ding, a diakdiak in na khat peuhpeuh sem dinga, ih ngimna, ih tupna te atangtun masiahin ih lungsim puakzia ding hong hilh hi. Topa Jesu Jerusalem ah apaina pen ama adingin gimthuak nading ahih hang, ei thuzui, thu um mite adingin Jerusalem khuapi ah ih om sungteng, Pasian tanu tapa, Pasian minam ih hih sungtengah Pasian in ei tawh hong om khawm den ding hi.

 Haksatna ih tuah ciang ahi zongin, gimthuakna ahi zongin, dam lohna tuamtuam te ih tuah ciang ahi zongin Pasian in ama minamte tawh omkhawm den hi cihna thu, anuntakna apiak khiat zah dongin ei ama thuzui, amah aum mite tawh hong ompih den hi cih ih phawk ding kisam hi. Topa Jesu in Jerusalem apai na ah lamkal ah atuak lemlohna te a om hangin, tua khua mite in asan loh hangin, amah asang mite khua tawnin apai mah bangin eite in zong, ih nuntakna sungah upna tawh ahi zongin, taksa tawh nasep silbawlna te ah zong lemlohna te a om hangin lungkia lo-in, alem theihna lampi zongin ih lungtupna khat peuhpeuh ah ih tunzawh nang ih hanciam ding tuni Topa Jesu in anungzuite tungah ahilh mah bangin ei Christian thuzuite in zong tua mah bangin lampi thakte a zong zo te ih hih zawh nangin hanciam ding kisam hi.

Tua ahih manin tuni hih Laisiangtho tungtawnin Topa Jesu in anungzuite tungah agen mah bangin kiniamkhiatna tawh ama nungzui in, ama na sem in, ei ii Pasian nasepna te ah hong sanglo a om tak ciangin zong eite in heh lo-in, asangte kiangah pai-in Pasian thu akizomin a tangko zo tanu tapa te ih suah zawh na dingin tuni Pasian kammalte tungtawnin tha la-in, Pasian deihna bangin, Pasian ii tanu tapa kicingtaak takin kician takin anungtazo tanu tapa te ih suahzawh nangin Topa Pasian in mimal kim tungah thupha hong pia ta hen.