Misiangtho khempeuhte pawipi ni

Tuni Pawlpi in misiangtho khempeuhte pawini in hong bawlsak na in kum khat sungin ni (365) bek om ahih manin misiangthote pawi ih bawl zawhloh, ih theih zawhloh Misiangthote tam mahmah ahih manin tua Misiangtho khempeuhte pawini dingin nikhat ciangtanin misiangtho khempeuhte pawi abawl ih hi hi.
Misiangtho te namnih om a, a masa penin leitungah hoih takin gamta zo a, mite etteh taak dinga na lian asem, a minthang Misiangthote pen Pawlpi in Pawlpi ngeina tawh kituakin kantel in Misiangtho suak takpi hi ci aa ciaptehna apiak te hi. Tua khit ciangin Pawlpi in ama minthanna tua zahpi in thei lo-in ciamteh lo hi mah ta leh leitungah hoih taka anungta, Pasian thu um a, Pasian thu tawh anungta, mi tampi zong Misiangtho suak ding hi. Tua te in Pawlpi ciaptehna sungah a ki hel loh hangin vantung gam tung dinga, vantunggam atung sa khempeuh pen ih theih khak loh hangin tua bangin Pawlpi ii a ciapteh Misiangtho leh a ki ciamteh lo Misiangtho ci-in namnih om hi. Tua ahih manin Misiangtho tampi lak ah hong nusia sa ih Pi ih Pu, ih Nu ih Pa leh ih sanggamte tampi tak om hi cih hong phawk sak nuam ing.
Hih Misiangtho te pawipi ni ih bawlna hangin thumanpha te phawkin Misiangtho te phatna ih ngah na ding, amaute’ hoihna phatna te eite tungah hong tung na ding leh Misiangthote tungtawnin thu ih nget theih na dingin hanciam ni. Tua bek tham lo-in Misiangthote ii hoihna phatna te ih etteh zawh nangin hanciam ni.