Mipil Thumte Pawi ni , Kha-an vakna.

Homily by Fr. Joseph Zo Mung (5.1.2020)

Topa Jesu hong kilah na pawi (Epiphany) kici hi. Tuni Lungdamna Lai Siangtho (Mt 2:1-12) na ih sim ciangin Topa Jesu a zong a hi mipil thum te leh Tuu Cingte in Topa Jesu pen a Nu Tonu Maria tawh bawngbuk sungah mu uh hi. Topa Jesu a zong te in Topa Jesu bek mulo in a Nu Tonu Maria tawh mu khawm hi cih thu tuni LST in hong thei sak hi. *Mitampi te in Topa Jesu hongpai ding lam thei khol hi mah ta leh Leitung Kumpi te bangin a hong pai dingin lamen uh a hih manun tu dong in a mu zo nai lo zong om hi. *Tuu Cing te in ki niamkhiatna leh itna tawh zong a hih manun mu in bia thei uh hi. *Herod kumpi pa in thah nopna, hazatna lungsim tawh zong a hih manin muzo lo hi. *Mipil thum te in a pilna uh tawh hanciam takin a hih theih zah un zong a hih manin a maute Aksipi in lam na lak uh hi. Tua a hih manin muthei in bia thei uh hi. *Ih pilna tawh ih hih theih tawp in zong leng Aksipi in lam hong lak ding hi. *Kiniamkhiatna tawh zong leng Tuu Cingte bangin ih mu thei ding hi. *Eite khatciat Mipilthum te leh Tuu Cing te bangin Topa Jesu zongin a mu te, a bia thei te leh ih neih lianbel tek letsongin a pia zong te ih hih nangin ih Biak Topa Pasian in thupha hongpia ta hen! Amen.