Mihingte muhna panin thupi I sak hetloh hang, Topa’ muhna ah thupi hi, manpha hi.

Lk 14 : 1, 7 – 11
Tuni Lungdamna Laisiangtho sungah Topa Jesu in, “Aki liansakte khempeuh in niamkhiatna thuak dinga, a kiniamkhiatte khempeuh a lianin kibawl dinghi,” ci hi. Isaiah Laisiangtho 55 : 8 sungah Pasian zia leh mihingte zia aki bat lohna thu hi bangin hong gen hi. “Bang hang hiam cih leh keima ngaihsutnate nomau’ ngaihsutna bang hilo a, keima pai zia te nomau’ paizia bang hilo hi,” ci hi. Pasian pen a sangna mun ah om ahih manin a sangin mu hi. Mihingte ahih leh, a niamna mun ah om I hih manin I muhna zong niam pah hi. Tua ahih manin, mihingte’n a pi muh mahmah khat pen Pasian muhna ah mi thupi hi khin pah tuanlo a, mihingte’n a neu muh mahmah khat zong Pasian muhna ah mi ginalo na hi pah tuanlo hi.
Mihingte muhna panin thupi I sak hetloh hang, Topa’ muhna ah thupi hi, manpha hi. Tua ahih manin ute naute aw, Pasian pen aneute a liansak, a thanemte a tha hatsak, a zawngkhalte a hausak Topa cih a tawntungin phawk ciatni. Mihingte muhna ah aneu pen, a thanem pen, a zawngkhal pen hi thei kha mah ni. Ahi zongin Topa’n tua bang mite mah thupha pia-in liansak, hatsakin lamto zaw hi. Leitung ah hau-in, lianin, na hat hang kiphasak kha kei-in.