Midangte adingin nasepsak ding a thupitna thu.

Hebrew 4 : 1 sungah mainawt ding ci hi. Ih maiah haksatna, gentheihna a om zongin ih tupna mitsuan tiltel in pai ding ci hi. 1 Peter 4 : 10 na sungah midangte adingin nasepsak ding ci hi. Pasian ong piak ih talent ki banglo a, siamna ki bang lo a, tua aki bang lo siamna pen ei mimal khat tekin midang te tungah zang thei leng mitampi te in noptuam pih ding hi ki ci hi. Rome 12: 15 sungah anuamte tawh nuam khawmin adahte tawh dah khawm leng tuain Makai te ii quality hi ci-in Laisiangtho sungah ih mu hi. Tuni Lungdamna Laisiangtho sungah James leh John te in Topa Jesu kiangah ama taklam leh veilam ah a tut sak na dingin ngen uh hi.
Topa Jesu in ka dawn ding hai, ka thuak ding gimthuakna te na thuak ngam ding uh hiam ci hi. Amau muhna pen vang nei ding, Topa Jesu in vang pia ding, phattuamna tampi pia ding hi cih lametna khat hi mai dinga, ahi zongin Topa Jesu thu tel taktak a, ama nasepna a tel tak uh teh Topa Jesu sihpih ngam uh hi. Mihing lungsim ah a kingak laitakin mun leh gam leh vang te deih a, ahi zongin upna tawh akalsuan ciangin tua te sangin Topa Jesu leh Pawlpi sihpih ngam hi. Topa Jesu ih upna, ih muanna tawh ih kalsuan ciangin ih ma vangin Topa adingin ih upna te ong picing a, ih sep ih bawlna te ah zong Pasian in ong lawhcing sak dingin ih um hi.
Tua ciangin ama ong gen ahi ulian asuak nuam te leh Makai a suak nuam te in midangte’ na sepsak in midangte sila suak ding acih ciangin sila suakpah ding cihna hi lo a, ih kim ihpaam ah a kisamte huhsiamin thu khualin, lungsim picingin itna tawh kalsuan ding Topa’ ong deih a, tua pen Christian nuntak zia ahi hi. Tua ahih manin Topa Jesu adingin a thuak ngam te leh Topa Jesu adingin ih itna tawh midangte avan zo te, midangte tungah thu khual zo a, Topa Jesu hong khapsa ahi vantunggam nuam tak a, atung zo te ih suahzawh na dingin hanciam ciatni.