"Mi khempeuh amaute’ gamtatna tawh kizui-in a thukkik ding hi"

Catholic Nisim Lai Siangtho, Hun Nautaang Nipi (22) Na, August 30, 2020

Lungdamna Lai Siangtho (Matthew 16: 21-27)

21. Jerusalem khuapi ah Jesu pai-in, upate, siampi liante le lai siangtho siamte’ tung panin gimna tampi thuak dinga, kithatin ni thum ni ciangin a thawhkikna ding thute a nungzuite’ kiangah tua hun a kipan teltakin a gen hi. 22. Peter in amah a tuamin paikhiat pih a, “Topa aw, hih bangin na tungah hong pian ding Pasian in phal kei ta hen!” ci-in a taai hi. 23. Ahi zongin Jesu kihei-in Peter’ kiangah, “Satan, ka nungah om in! Kei’ aadingin khaktanna na suak hi. Bang hang hiam cih leh, na ngaihsutnate in Pasian’ ngaihsutna hi lo a, mihingte’ ngaihsutna ahi hi,” a ci hi. 24. Tua khit ciangin Jesu in a nungzuite’ kiangah, “Mi khatpeuh in ka nung hong zuih nop leh ama deihna nialin, ama singlamteh pua-in ka nung hong zui hen. 25. Bang hang hiam cih leh, ama nuntakna pammaih a kisate in a nuntakna suplawh ding hi. Keima aadingin a nuntakna a suplawhte in nuntakna a ngah ding hi. 26. Mi khatpeuh in leitung buppi a neih hangin a nuntakna suplawh leh ama aadingin bang phattuamna om ahi hiam? Ahih kei leh ama nuntakna bang tawh khek thei ding ahi hiam? 27. Bang hang hiam cih leh mihing’ Tapa in a Pa’ minthanna tawh a vantung mite tawh hong pai ciangin mi khempeuh amaute’ gamtatna tawh kizui-in a thukkik ding hi.

Hih in Topa' Lungdamna Lai Siangtho ahi hi.