Mawhna kisik lohna hangin thukhenna ih thuak hi.

Daily Homily by Rev. Fr. David Sut Hau Lian (May 24, 2021)

Pasian Christain te pen mawhna abawl na hangin thukhen lo hi. A hih hangin akisik loh hangin thukhen hi. Tua ahih manin kisik loh na hangin thukhen na kituak ding hi. Tua sangin kisik in Pasian kiang zuan in ih om ciang Pasian nopna zong ih ngah ding hi. A hun om lai in kisik ding hi hang, bang hang hiam cih leh eite in bangni banghun in ih nuntakna bei ding cih theilo hi hang. Topa Jesu Calvary mualtung ah hong sih laitakin atak lam aa kikhai mipa in kisik in Topa Jesu kiangah mawhmaina anget ciangin Topa in napia hi. Ama aading kisikna hun hoih mahmah a tawpna ahi hi. A hih hangin eite nuntakna ah bangci banghun in kisik hun ngah ding cih kitheilo hi. Tua ahih manin ih biakpiakna hun te ah zong kisik ding leh Topa Jesu nung zuih ding tha hongpiak mah bangin, tuni mahmah eite ih mawhna pan kisikin haksatna atuak ih veng ihpam aa om, gam hoih lohna hangin leh thuman na hangin haksatna atuak mi khempeuh te tungah huhna thupha bawlna tawh Topa Jesu nung zui in ama deihna bangin gamta in Topa Jesu nopna sungah alut te ih hih nang hanciam ciat ni.