Lungsim ngimnate a man ding, lungsim siangtho ding, lungsim muanhuai, lungsim cihtakna te a nei dingin Topa’n hong deih hi.

Topa Jesu in Lai Siangtho sungah a zatnate in a khiatna nei vive hi a, tu ni ih zak Theikungte ahi zongin, Lenggahte ahi zongin, Lingte ahi zongin ama khiatna ciat a nei vive hi. Tua ahih manin ei te in ih zak thute mangsak lo-in, ih lungsimah tengsakin tu ni in inn limtakin a lampa te ih bat theih ding kisam hi. Cih nopna ah ih upna a zungkhahin ih upnate mite tungah ih lah zawh na ding nakpi takin kisam hi. Hoihna, phatnate pen kampau siamna, kampau zaknopa pau theihna te in laih thei lo hi, mun la thei lo hi. Tua ahih manin gamtat hoihna in bangzahin thupi hiam.

Singgahte zong ahoihte pen akung tawh kithei hi a cih mah bangin Singgah ahoih leh a kung zong hoih ding, kampau mukpau, gamtat luhek aman leh mihoih mipha in kithei ding hi. Ei mihingte in apuatham en in apuatham tawh akhen thei te ih hi hi. Ahi zongin Topa Jesu in ih lungsim tawng, ih lungsim ngaihsutna, ih lungsim ngimna, ih lungsim deihna, ih lungsim lunggulhna, ih lungsim utna khempeuh hong thei pa ahi hi. Hoihna, phatna, dikna te ih ngaihsut leh hong thei pa ahi hi.

Siatna, hoihlohna, gitlohna ih ngaihsut leh zong Topa in hong thei hi. Tuni Topa deihna in ih lungsim ngimnate a man ding, lungsim siangtho ding, lungsim muanhuai, lungsim cihtakna te a nei dingin Topa’n hong deih hi. Tua hi leh nasepnate ah zong a hoihte sem zo in, a dikte sem zo in, amante sem zo in mite ading bek tham lo-in, eite ading, mite nop nading ih piang sak ding hi. Tua ahih manin Topa Jesu in ei te bek ahoih dingin hong deih hi lo hi. Ei te tungtawnin hoihna, phatna te a sem khia dingin, abawl khia dingin, a zek khia dingin Topa’n hong deih hi cih phawkin mailamah hih thuphate ih ngah theih na dingin thupha bulpi ahi Topa tungah kinga ni.Topa tungah lungmuangin, khamuangin, hihna khempeuh, lungsim khempeuh, theihna khempeuh ki-ap in Topa sungah nungta in na semni.