"Lunghiang loin kei hong um mi peuhmah in thupha ngah ahi hi”

Catholic Nisim Lai Siangtho. Adventu Nipi Kaal (3) Na (SUN) December 15.2019

Lungdamna Lai Siangtho. (Matthew 11: 2-11)

2. John in thong sung panin Messiah’* nasepnate a zak ciangin ama kiangah a nungzuite sawl a,

3. “Nangmah in hong pai dingpa mah na hi hiam? Ahih kei leh midang khat na lamen lai ding ka hi uh hiam?” ci-in a dongsak hi.

4. Jesu in amaute’ kiangah, “Pai unla, John’ kiangah na muh na zak thute uh va gen un.

5. Mittawte in khua mu kik uh a, khebaite a pai thei uh hi, miphakte dam siang uh a, bengngongte in khuaza-in, misite hing kik a, mizawngte’ kiangah lungdamna thu kigen hi.

6. Lunghiang loin kei hong um mi peuhmah in thupha ngah ahi hi,” a ci hi.

7. Tua mite a ciah khit uh ciangin Jesu in mihonpite’ kiangah John’ thu gen kipan a, “Note in bang en dingin gamlak ah pai na hi uh hiam? Huih mut-a huang pumpengte a en dingin a pai na hi uh hiam?

8. Ahih kei leh bang en dinga pai na hi uh hiam? Puan nel silhte en dinga paikhia na hi uh hiam? En un, puan nel silhte in kumpi’ inn sungah a om uh hi.

9. Tua ahih leh, bang en dingin note a pai na hi uh hiam? Kamsangpa a en dinga pai na hi uh hiam? Hi mah hi, ken kong genin ah, kamsangpa’ sangin a lianzaw hi.

10. Lai Siangtho sungah, ‘En in, na paina ding lampi a sialkhol dingin na mai-ah ka kamtaipa ka sawl ding hi,’ ci-in kigelh hi.

11. A man takpi kong genin ah, numei sung pan a piangte’ lakah Tuisawppa(a) John sanga lianzaw kuamah piangkhia nai lo hi. Ahi zongin Vantung Gam sungah a neu pen nangawn in John sangin lianzaw hi.

Hih in Topa’ lungdamna Lai Siangtho ahi hi.