Lungdamna Laisiangtho sungsimna John 6:35-40 (April 17 ,2024) Wednesday

Catholic Nisim Lungdamna Laisiangtho John 6:35-40------------------ 35. Jesu in amaute’ kiangah, “Keimah in nuntakna khomun ka hi hi. Kei’ kiangah hong pai mi peuhmah cikmah hunin gilkial ngei nawn lo ding a, kei hong um peuhmah in dangtak ngei nawn lo ding hi.

36. Ahi zongin note in kei hong mu napi-in nong um kei uh hi, kong ci zo hi.

37. Ka Pa’ hong piakte khempeuh ka kiangah hong pai ding uh hi. Ka kianga hong pai mite ka hawlkhia ngei kei ding hi.

38. Bang hang hiam cih leh, keima deihna bangin a gamta ding hi loin, kei hong sawlpa’ deihna bangin a gamta dingin keimah in vantung panin hong kumsuk ka hi hi.

39. Kei hong sawlpa’ deihna in ahih leh, kei hong piak khempeuh khat zong mansuah lo a, ni tawp ni ciangin amaute ka thawhkiksakna ding ahi hi.

40. Ka Pa’ deihna in ahih leh Tapa mu a, amah a umte khempeuh in nuntak tawntungna a ngahna ding uh ahi hi. Keimah in zong amah ni tawp ni ciangin ka thokiksak ding hi,” a ci hi.

+Hih in Topa' Lungdamna Laisiangtho ahi hi.

- Christu Topa aw na tungah phatna om ta hen.