Lungdamna Laisiangtho Matthew 6:1-6, 16-18 sungsimna (Feb.14,2024) Ash Wednesday

Catholic Nisim Lungdamna Laisiangtho Matthew 6:1-6, 16-18  **************  1. “Note in thupha na bawl uh ciangin mite’ phat ding utna tawh mite’ mai-ah na bawl lohna dingun kidawm un. Tua bangin na gamtat uh leh vantunga om na pa uh kiang panin phattuamna na ngah kei ding uh hi.

2. “Tua ahih manin mi cimawhte’ tungah hehpih huhna na piak uh ciangin mite’ phat ding ut manin kikhopna innte le kongzing lakah a tangko mi hoih kineihte’ hih bangin na mai uh ah peengkul na mutsak kei un. Keimah in note’ tungah a mantakpi kong genin ah, tua bangin ahih mite in a thaman uh a kicingin a ngah khin zo uh hi.

3. Ahi zongin note in a cimawhte’ tungah hehpih huhna na piak uh ciangin na taklam khut’ hihna na veilam khut na theisak kei un.

4. Tua hi leh a simthama hehpih huhna na piak uh kuamah in mu lo dinga, a simthama a kihihte a mu na Pa un note thaman hong pia ding hi.

5. “Note in thu na nget uh ciangin mi hoih kineihte in kikhopna inn sung le kongzing lamka bomah dingin mite’ muh dingin thu a nget uh bangin na gamta kei un. A man takpi kong genin ah, amaute in a thaman uh a cingin a sang khin zo uh hi.

6. Ahi zongin note in thu na nget uh ciangin na inndei sung uh ah lut unla, kong kikhakcipin a kimuh lohna a om na Pa uh kiangah na ngen un. Tua hi leh a simtham-a kihihte a mu na Pa un note thaman hong pia ding hi.

16. “Note in an na tan’ uh ciangin, mi hoih kineihte bangin na mai uh vulsakin na om kei un, bang hang hiam cih leh, amaute in a an tan lam uh mite in a theihna dingin a mai uh a khingsak uh hi. Ken a man takpi kong genin ah, amaute in a thaman uh a kicingin a ngah khin zo uh hi.

17. Ahi zongin note in an na tan uh ciangin na sam uh sathau nilh unla, na mai uh phiat un.

18. Tua hi leh a kimu theilo na Pa uh longal midangte in na an tan lam uh hong thei lo ding uh a, na an tan lam uh hong thei na Pa un na tung uh ah thaman hong pia ding hi.

+Hih in Topa' Lungdamna Laisiangtho ahi hi.

- Christu Topa aw na tungah phatna om ta hen.